U akuzua se ishte pjesë e një rrjeti spiunazhi, KE mbyll hetimin për Olivér Várhelyi

Komisioni Europian ka përfunduar hetimin e brendshëm ndaj komisionerit hungarez për Shëndetësinë, Olivér Várhelyi, lidhur me akuzat për përfshirjen e tij në një rrjet të dyshuar spiunazhi në Bruksel që synonte punonjës të Bashkimit Europian.

Sipas njoftimit zyrtar, hetimet nuk kanë zbuluar prova që lidhin drejtpërdrejt Várhelyin apo zyrtarë të tjerë të Komisionit me aktivitetet e pretenduara të inteligjencës hungareze. Për pasojë, çështja është mbyllur pa masa ndaj komisionerit hungarez, i cili do të vazhdojë të mbajë postin e tij në Komisionin Europian.

Skandali doli në dritë në tetor të vitit të kaluar, kur disa media ndërkombëtare raportuan se përfaqësia e përhershme e Hungarisë pranë BE-së në Bruksel kishte përdorur persona të lidhur me shërbimet sekrete, të paraqitur si diplomatë, për të mbledhur informacione sensitive mbi çështje që lidhen me Hungarinë.

Sipas raportimeve, aktiviteti i dyshuar kishte ndodhur gjatë viteve 2012–2018 dhe kishte në shënjestër veçanërisht zyrtarët hungarezë që punonin në institucionet europiane, me synimin për të siguruar dokumente konfidenciale.

Zëdhënësi i Komisionit Europian, Balázs Ujvári, deklaroi se hetimi nuk arriti të provojë përfshirjen e individëve të tjerë përveç personave të dyshuar si agjentë inteligjence. Ai shtoi se nuk ka prova që ndonjë punonjës i Komisionit të jetë rekrutuar me sukses.

Emri i Várhelyit u përfshi në hetim për shkak se ai ka shërbyer si ambasador i Hungarisë në BE gjatë viteve 2015–2019, një pjesë e periudhës kur dyshohet se ka vepruar rrjeti i spiunazhit.

Vetë Várhelyi i ka mohuar akuzat dhe ka deklaruar se nuk kishte dijeni për aktivitetet e pretenduara.

Vendimi i Komisionit vjen vetëm një ditë para marrjes së detyrës nga kryeministri i ri hungarez, Péter Magyar, i cili fitoi zgjedhjet e fundit parlamentare. Magyar, që ka punuar më herët si diplomat në përfaqësinë hungareze në Bruksel, kishte deklaruar më parë se Várhelyi nuk kishte treguar të gjithë të vërtetën mbi çështjen.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)