“Po përjetojmë një krizë të madhe”, civilët në mëshirë të fatit pas bombardimeve në Liban

Civilët në Liban po hasin vështirësi serioze për të siguruar ilaçe, ndërsa bombardimet nga Izraeli vijojnë në disa zona të vendit. Situata është veçanërisht e rëndë në kryeqytetin Bejrut, i cili ka qenë nën sulme për disa ditë radhazi.

Cyrine Farhat, 34 vjeçe, nënë e dy fëmijëve dhe e diagnostikuar me diabet të tipit 1, e përshkroi gjendjen si “një krizë të madhe”. Ajo tha se situata në terren është “jashtëzakonisht e tensionuar”, me bombardime të vazhdueshme dhe përshkallëzim të shpejtë të dhunës.

Sipas saj, vendi po përballet me mungesë serioze të insulinës. Farhat ka kontrolluar disa farmaci për të siguruar ilaçin e saj, por pa sukses. “Jam personalisht pa rezerva dhe arrita të siguroj vetëm një kuti, e cila do të më zgjasë rreth një muaj,” tha ajo.

Sipas International Diabetes Federation, personat me diabet të tipit 1, në mungesë të insulinës, mund të zhvillojnë një gjendje të rrezikshme të quajtur ketoacidozë diabetike. Nëse nuk trajtohet, kjo gjendje mund të çojë shpejt në vdekje.

Furnizuesit, sipas Farhat, nuk kanë dhënë një afat të qartë se kur do të rifillojë furnizimi me insulinë në farmaci dhe nuk kanë ofruar “asnjë arsye apo shpjegim të duhur” për situatën.

Farhat është themeluese e organizatës jofitimprurëse Positive on Glucose, e cila mbështet personat me diabet. Ajo thotë se shumë pacientë të tjerë po i drejtohen për ndihmë, pasi nuk po arrijnë të gjejnë insulinë, por ajo vetë është e pafuqishme për t’i ndihmuar.

“Ankthi që kjo situatë krijon, mbi zhvendosjen dhe pasigurinë, është dërrmues,” përfundoi ajo për CNN.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)