Aktivistët e kapur nga Izraeli me sy të lidhur e në gjunjë, Ben Gvir tallet, ministri Saar e sulmon

Aktivistët e flotiljes së ndaluar nga marina izraelite pranë brigjeve të Qipros kanë nisur të mbërrijnë në portin izraelit të Ashdodit, ndërsa reagimet ndërkombëtare për trajtimin e tyre janë përshkallëzuar.

Sipas organizatës ligjore Adalah, e cila po ofron asistencë për të ndaluarit, ekipet juridike kanë nisur takimet me disa prej aktivistëve dhe do të kundërshtojnë ligjshmërinë e ndalimeve.

“Ekipi ligjor i Adalah do të sfidojë ligjshmërinë e këtyre ndalimeve dhe do të kërkojë lirimin e menjëhershëm të të gjithë pjesëmarrësve të flotiljes”, deklaroi organizata.

Autoritetet izraelite ndërkohë pretenduan se kanë marrë nën kontroll të gjitha anijet e flotiljes, duke ndaluar rreth 430 aktivistë.

Ndërkohë, Ministri izraelit i Sigurisë Kombëtare, Itamar Ben Gvir, publikoi në rrjetet sociale video nga porti i Ashdodit, ku shihen aktivistë me pranga dhe sy të lidhur, të detyruar të gjunjëzohen në tokë. Në pamje, Ben Gvir dëgjohet duke thënë: “Mirë se vini në Izrael, ne jemi të zotët e shtëpisë” dhe “populli i Izraelit është gjallë”.

Në një tjetër video, një aktivist që bërtet “Liri për Palestinën” shihet duke u rrëzuar përtokë nga një oficer policie.

Sipas mediave izraelite, aktivistët janë mbajtur në një depo në portin e Ashdodit, ku janë rreshtuar me duart e lidhura pas shpine dhe janë detyruar të qëndrojnë në gjunjë. Pamjet kanë shkaktuar reagime të forta në Itali, ku kryeministrja Giorgia Meloni dhe ministri i Jashtëm Antonio Tajani i cilësuan videot “absolutisht të papranueshme”.

“Imazhet e ministrit izraelit Ben Gvir janë të papranueshme. Është e papranueshme që këta protestues, përfshirë shumë qytetarë italianë, t’i nënshtrohen një trajtimi që cenon dinjitetin njerëzor”, thuhet në deklaratën e përbashkët të Melonit dhe Tajanit.

Foto: X

Dy zyrtarët italianë njoftuan se qeveria italiane ka nisur menjëherë veprimet diplomatike për lirimin e qytetarëve italianë të përfshirë dhe ka kërkuar sqarime zyrtare nga Izraeli.

“Për këto arsye, Ministria e Jashtme do të thërrasë menjëherë ambasadorin izraelit për të kërkuar shpjegime mbi atë që ka ndodhur”, deklaruan ata.

Edhe vetë Ministri i Jashtëm izraelit, Gideon Saar, reagoi publikisht kundër Ben Gvirit. “Ju nuk jeni fytyra e Izraelit. Me këtë performancë të turpshme i keni shkaktuar dëm vendit dhe kjo nuk është hera e pare”, shkroi ai në një postim në rrjetin X.

Ai shtoi se publikimi i videove ka minuar përpjekjet diplomatike dhe institucionale të Izraelit në një moment tejet të ndjeshëm. Sipas Farnesinës, Tajani zhvilloi kontakte gjatë natës me homologun izraelit Saar dhe kërkoi lirimin sa më të shpejtë të qytetarëve italianë, mes tyre një parlamentar dhe një gazetar.

Autoritetet italiane konfirmuan se diplomatët italianë në Izrael janë në kontakt me autoritetet portuale të Ashdodit për të ofruar asistencë konsullore dhe për të lehtësuar kthimin e aktivistëve në Itali.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)