Bie miti i fotosintezës: Zbulohet oksigjen që krijohet në 4 mijë metra thellësi, në errësirën totale të oqeanit

Për dekada me radhë, shkenca ka qenë e qartë: oksigjeni në Tokë prodhohet përmes fotosintezës, një proces që kërkon dritën e diellit dhe që kryhet nga bimët apo algat.

Por një zbulim i fundit mund të ndryshojë këtë bindje themelore. Në thellësinë prej afro 4 mijë metrash në Oqeanin Paqësor, në një zonë ku mbizotëron errësira totale dhe drita e diellit nuk depërton kurrë, shkencëtarët kanë zbuluar prodhim aktiv të oksigjenit në fund të detit.

Fillimisht, studiuesit dyshuan për një gabim në matje. Megjithatë, pas përsëritjes së eksperimenteve me pajisje të ndryshme, rezultatet mbetën të njëjta: niveli i oksigjenit në zonë trefishohej brenda vetëm dy ditësh.

Burimi i këtij fenomeni të pazakontë rezultoi të jenë të ashtuquajturat noduj polimetalikë: bëhet fjalë për formacione minerale të krijuara në miliona vite nga grumbullimi i elementeve si mangani dhe kobalti në shtratin e oqeanit.

Foto nga web

Sipas studiuesve, këta “gurë” funksionojnë si një lloj baterie natyrore, duke gjeneruar energji elektrike të mjaftueshme për të ndarë molekulat e ujit në hidrogjen dhe oksigjen. Ky proces ndodh pa praninë e dritës apo jetës, vetëm përmes reaksioneve kimike. Ky zbulim ka implikime të mëdha edhe për kërkimet jashtë Tokës.

Nëse oksigjeni mund të prodhohet pa fotosintezë, atëherë forma jete që përdorin oksigjenin mund të kenë ekzistuar para shfaqjes së bimëve në Tokë, ose mund të ekzistojnë edhe në botë të tjera.

Shkencëtarët sugjerojnë se kushte të ngjashme mund të gjenden në hëna të akullta si Europa apo Encelado, ku nën sipërfaqe mendohet se ekzistojnë oqeane të fshehura. Zbulimi i fundit tregon se ajo që mendohej si një e vërtetë e pakundërshtueshme për mënyrën se si krijohet oksigjeni, mund të mos jetë aq absolute sa besohej.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)