E thotë shkenca: Të merresh me këta njerëz plakesh më shpejt

Marrëdhëniet shoqërore jo të shëndetshme mund të kenë pasoja më të thella sesa mendohej deri më sot, duke ndikuar drejtpërdrejt në procesin e plakjes së organizmit. Këtë e tregon një studim i fundit shkencor, i cili lidh ndërveprimet negative me ndryshime biologjike konkrete.

Sipas kërkimit të publikuar në Proceedings of the National Academy of Sciences, kontaktet e vazhdueshme me persona që krijojnë stres, si debatet e shpeshta, manipulimi emocional apo konfliktet e vazhdueshme, mund të përshpejtojnë plakjen e qelizave. Studiuesit nuk u mbështetën vetëm në perceptime subjektive, por analizuan tregues biologjikë të matshëm.

Një nga efektet kryesore është rritja e inflamacionit kronik, një gjendje e heshtur por e vazhdueshme që lidhet me sëmundje si problemet e zemrës, diabeti dhe rënia e funksioneve njohëse. Po ashtu, është konstatuar një rritje e radikaleve të lira, të cilat dëmtojnë qelizat dhe përshpejtojnë konsumimin e indeve.

Studimi evidenton edhe ndikimin te telomerët, strukturat që mbrojnë kromozomet dhe që shkurtohen me kalimin e moshës. Stresi social i vazhdueshëm përshpejton këtë proces, duke u konsideruar një tregues i qartë i plakjes biologjike.

Gjithashtu, janë vërejtur ndryshime epigjenetike, që ndikojnë në aktivizimin e gjeneve, duke treguar se trupi “regjistron” stresin në nivel molekular.

Ekspertët theksojnë se truri e percepton stresin social si kërcënim real, duke rritur nivelin e kortizolit dhe duke dobësuar sistemin imunitar. Megjithatë, shmangia e marrëdhënieve toksike dhe ndërtimi i lidhjeve të shëndetshme mund të ndihmojë në rikthimin e ekuilibrit dhe mbrojtjen e shëndetit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)