Sot i përfundon mandati, presidentja Osmani ia dorëzon detyrën kryeparlamentares Haxhiu

Data 4 prill 2026 shënon fundin e mandatit të Presidentes të Republikës së Kosovës, Vjosa Osmani. Në mungesë të zgjedhjes së presidentit të ri, ajo do t’ia dorëzojë detyrën kryetares së Kuvendit të Kosovës, Albulena Haxhiu.

Kjo e fundit do të ushtrojë kompetencat presidenciale në mënyrë të përkohshme, deri në zgjedhjen e kreut të ri të shtetit. Sipas njoftimit zyrtar nga Presidenca, ceremonia e dorëzim-pranimit do të zhvillohet në Kabinetin e Presidentes, në orën 16:00.

“Presidentja e Republikës së Kosovës, Vjosa Osmani ia dorëzon detyrën Kryetares së Kuvendit të Republikës së Kosovës, Albulena Haxhiu. Akti ceremonial i dorëzim-pranimit të detyrës do të mbahet në Kabinetin e Presidentes”, thuhej në njoftim.

Ndërkohë, Kosova po përballet me një situatë të tensionuar politike, pasi Kuvendi nuk ka arritur të zgjedhë presidentin e ri për shkak të mungesës së kuorumit, duke bërë që seanca të ndërpritet. Ngërçi u thellua edhe më shumë pas vendimit të presidentes Osmani për shpërndarjen e Kuvendit dhe paralajmërimin e zgjedhjeve të jashtëzakonshme.

Ky vendim u kontestua dhe u dërgua në Gjykatën Kushtetuese. Gjykata Kushtetuese vendosi se dekreti i Osmanit për shpërndarjen e Kuvendit nuk ka efekt juridik, ndërsa i dha Kuvendit një afat prej 34 ditësh për zgjedhjen e presidentit të ri.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)