Në pritje të dalë para prokurorit, Artan Grubi dërgohet në burgun që akuzohet për kushte çnjerëzore

Ish-zv.kryeministri i Maqedonisë së Veriut, Artan Grubi, është transferuar në burgun e Shuto Orizares, pasi u ndalua mëngjesin e sotëm në pikën kufitare të Bllacës, teksa u dorëzua te autoritetet pa bërë rezistencë. Lajmi është konfirmuar nga Ministria e Punëve të Brendshme e vendit fqinj.

Ajo konfirmoi se Grubi është dërguar në njësinë e paraburgimit në Shuto Orizare, pasi ndaj tij ishte caktuar masa e paraburgimit prej 30 ditësh në mungesë, për shkak se ndodhej në arrati. Burgu në fjalë ka qenë vitet e fundit nën akuzë për kushte çnjerëzore.

Ajo është një prej strukturave penitenciare që ka problematika të theksuara me mbipopullimin, kushtet johigjenike dhe nën standarde, kujdes mjekësor të pamjaftueshëm, si edhe mungesë të ndihmës juridike apo moszbatim të programeve të risocializimit.

Vetëm pak vite më parë, Komiteti Europian për Parandalimin e Torturës dhe Trajtimit ose Ndëshkimit Çnjerëzor e Poshtërues, kishte kërkuar kushte më të mira për të paraburgosurit, ku pavarësisht progresit nga autoritetet ky burg kishte “çështje serioze për të zgjidhur”.

Nga Prokuroria Publike në Shkup njoftojnë se në vijim do të japin më shumë detaje lidhur me procedurën dhe se pritet të bëhet e ditur koha kur Grubi do të paraqitet para prokurorit publik. Artan Grubi, së bashku me ish-drejtorin e Lotarisë Shtetërore, Përparim Bajramin, akuzohet për përvetësim të fondeve në kuadër të Lotarisë Shtetërore në Maqedoninë e Veriut.

Foto: Newsmax Balkans

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)