Kroacia dhe Maqedonia e Veriut nënshkruajnë marrëveshjen e bashkëpunimit strategjik

Maqedonia e Veriut dhe Kroacia kanë nënshkruar një memorandum mirëkuptimi dhe një marrëveshje bashkëpunimi strategjik në sektorin e energjisë, me synimin për të forcuar sigurinë energjetike dhe bashkëpunimin rajonal.

Dokumentet u firmosën gjatë një vizite pune në Maqedoninë e Veriut nga një delegacion i nivelit të lartë kroat i udhëhequr nga kryeministri Andrej Plenković.

Vizita përfundoi me organizimin e një forumi biznesi ku morën pjesë përfaqësues të komuniteteve të biznesit nga të dy vendet. Në forum u diskutuan mundësitë për projekte të reja dhe investime, veçanërisht në sektorin e energjisë.

Ministrja e Energjisë, Minierave dhe Burimeve Minerale e Maqedonisë së Veriut, Sanja Bojinovska, deklaroi se energjia është një nga fushat më strategjike për Evropën dhe rajonin, sidomos pas zhvillimeve në Ukraina dhe Lindjen e Mesme.

“Siguria energjetike nuk është më vetëm çështje ekonomike, por edhe çështje gjeopolitike dhe sigurie. Vendet që bashkëpunojnë dhe investojnë në projekte të përbashkëta infrastrukturore do të jenë më të forta dhe më të qëndrueshme ndaj sfidave të ardhshme”, u shpreh ajo.

Memorandumi synon krijimin e një kornize bashkëpunimi në disa fusha kyçe, përfshirë forcimin e sigurisë energjetike, ndërlidhjet rajonale, integrimin e energjisë së rinovueshme, zhvillimin e tregut të energjisë elektrike dhe harmonizimin me rregullat e Bashkimit Evropian.

Po ashtu, marrëveshja parashikon shkëmbim njohurish, forcim të kapaciteteve institucionale dhe mbështetje për nisma të përbashkëta në sektorin energjetik.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)