Tragjedi në Mesdhe, 22 emigrantë humbin jetën gjatë rrugës drejt Greqisë

Një tjetër dramë humanitare është regjistruar në Deti Mesdhe, ku të paktën 22 emigrantë kanë humbur jetën gjatë një udhëtimi nga Libia drejt Greqia.

Sipas dëshmive të personave të shpëtuar, viktimat ndërruan jetë pas disa ditësh në det, për shkak të kushteve ekstreme dhe mungesës së ushqimit dhe ujit. Të mbijetuarit kanë rrëfyer se trupat e pajetë janë hedhur në det gjatë udhëtimit.

Në të njëjtën mjet lundrues ndodheshin gjithsej 48 persona. Prej tyre, 26 arritën të shpëtohen pranë ishullit të Kretës nga një anije e Frontex. Mes të shpëtuarve raportohet se kishte edhe gra dhe të mitur, ndërsa dy persona janë dërguar për trajtim në spitalin e Heraklionit.

Hetimet paraprake tregojnë se varka ishte nisur më 21 mars nga zona e Tobruk. Gjatë udhëtimit, emigrantët kanë humbur drejtimin dhe kanë mbetur për ditë të tëra në det të hapur.

Autoritetet greke kanë ndërhyrë menjëherë pas shpëtimit dhe kanë arrestuar dy persona nga Sudani i Jugut, të moshës 19 dhe 22 vjeç, të cilët dyshohen se kanë organizuar këtë udhëtim të rrezikshëm.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)