Pirro Vengu mbledh Komitetin e Emergjencave Civile për situatën nga reshjet

Ministri i Mbrojtjes, Pirro Vengu, mblodhi sot Komitetin Ndërministror të Emergjencave Civile, në ambientet e Agjencisë Kombëtare të Mbrojtjes Civile, për të analizuar situatën e krijuar nga reshjet intensive të shiut gjatë 24 orëve të fundit në vend.

Gjatë takimit u diskutua situata në zonat më të prekura nga përmbytjet dhe problematikat infrastrukturore, si dhe masat emergjente të ndërmarra nga strukturat përgjegjëse. Ministri Vengu kërkoi gatishmëri të plotë, koordinim të vazhdueshëm mes institucioneve dhe monitorim të pandërprerë për garantimin e sigurisë së qytetarëve.

Reshjet kanë prekur pjesën më të madhe të territorit, duke shkaktuar problematika në disa qarqe, pa pasoja serioze për jetën e qytetarëve. Vëmendje e shtuar po i kushtohet qarqeve Lezhë dhe Durrës, ku janë evidentuar rritje të niveleve të lumenjve dhe prani uji në disa akse rrugore.

Sipas IGJEO-s, reshjet pritet të vijojnë deri më 8 janar. Strukturat e mbrojtjes civile mbeten në gatishmëri të plotë, ndërsa qytetarët ftohen të shmangin zonat me risk dhe të kërkojnë ndihmë në rast nevoje.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)