Përmbytje në Lezhë e Kurbin, deputeti demokrat: Korrupsioni dhe keqmenaxhimi i zhyti banorët nën ujë

Përmbytjet e fundit kanë goditur edhe zonat e Lezhës dhe Kurbinit, ku dhjetëra familje përballen me humbje të mëdha materiale. Deputeti i Partisë Demokratike për qarkun Lezhë, Gjin Gjoni, ka reaguar publikisht duke denoncuar situatën dhe duke publikuar pamje e dëshmi nga banorët e prekur, të cilët shprehen të zhgënjyer dhe të lënë pas dore nga institucionet.

Në reagimin e tij, Gjoni thekson se përmbytjet nuk janë pasojë e reshjeve të jashtëzakonshme, por e keqmenaxhimit, korrupsionit dhe mungesës së ndërhyrjeve reale parandaluese. Sipas tij, çdo episod shiu kthehet në një dramë për banorët, ndërsa projektet e shpallura si masa antipërmbytje mbeten vetëm në letra dhe propagandë.

Deputeti demokrat nënvizon se për vite me radhë janë shpenzuar miliarda lekë për ndërhyrje që nuk kanë dhënë asnjë efekt konkret në terren. Pamjet nga zona të ndryshme, nga Zadrima dhe bregu i Matit në Lezhë, deri në Gjorm dhe Adriatik të Kurbinit, sipas tij, dëshmojnë qartë dështimin e institucioneve përgjegjëse për të mbrojtur qytetarët.

Banorët e zonave të prekura shprehen se ndihen të braktisur nga pushteti vendor dhe ai qendror, ndërsa kërkojnë ndërhyrjen e drejtësisë për të vënë para përgjegjësisë autorët e kësaj situate të përsëritur. Gjin Gjoni deklaron se do ta ndjekë çështjen deri në fund, duke kërkuar vlerësim të drejtë të dëmeve dhe kompensim të plotë për familjet e prekura, duke e cilësuar të papranueshme vazhdimin e kësaj gjendjeje pa zgjidhje konkrete.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)