“Rrezikohet pavarësia e pushtetit gjyqësor”, Shoqata e Gjyqtarëve ngre shqetësimin për ndryshimet ligjore

Shoqata Kombëtare e Gjyqtarëve të Republikës së Shqipërisë ka shprehur shqetësime serioze lidhur me një projektligj të ri, i cili parashikon ndryshime në statusin e gjyqtarëve dhe prokurorëve, duke paralajmëruar se këto ndërhyrje cenojnë parimet kushtetuese dhe pavarësinë e pushtetit gjyqësor.

Në një reagim zyrtar, Shoqata bën të ditur se është njohur me projektligjin “Për disa shtesa dhe ndryshime në ligjin nr. 96/2016”, i dërguar nga Kuvendi për konsultim, si pjesë e paketës së ndryshimeve të reformës në drejtësi. Ndërsa thekson gatishmërinë për bashkëpunim institucional, Shoqata nënvizon se çdo ndryshim ligjor duhet të respektojë ndarjen dhe balancimin e pushteteve, si dhe të mos dëmtojë arritjet e deritanishme të reformës në drejtësi.

Sipas Shoqatës, problematika kryesore lidhet me një dispozitë të re, konkretisht nenin 170/3, i cili parashikon që kryetarët aktualë në detyrë të gjykatave të shkallës së parë dhe të apelit të konfirmohen automatikisht në këto poste deri më 31 dhjetor 2028, duke shmangur procesin e garës. Ky veprim, sipas gjyqtarëve, përbën një ndërhyrje të drejtpërdrejtë në kompetencat kushtetuese të Këshillit të Lartë Gjyqësor, i cili është organi i vetëm që ka të drejtën e emërimit dhe ngritjes në detyrë të gjyqtarëve.

Shoqata vëren gjithashtu se dispozita në fjalë zbatohet vetëm për gjykatat e juridiksionit të përgjithshëm dhe administrativ, duke përjashtuar gjykatat e posaçme, çka e bën atë selektive dhe të pashpjegueshme. Po ashtu, theksohet se KLGJ ka miratuar tashmë procedurat për zgjedhjen e kryetarëve të gjykatave, të cilat kanë hyrë në fuqi nga 1 janari 2026.

Në këtë kontekst, Shoqata i bën thirrje Kuvendit që të mos cenojë standardet e shtetit të së drejtës dhe të respektojë jurisprudencën e Gjykatës Kushtetuese, duke garantuar pavarësinë reale të pushtetit gjyqësor.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)