Aksi Elbasan-Qafë Thanë rreth 5 orë i bllokuar, të sëmurët transportohen me barelë përmes lumit

Një rrëshqitje masive gurësh dhe dheu nga mali ka bllokuar totalisht aksin rrugor Librazhd–Qafë Thanë mesditën e së dielës, në zonën e njohur si Kthesa e Dragostunjës. Si pasojë, qarkullimi i automjeteve është ndërprerë në të dyja drejtimet, duke shkaktuar radhë kilometrike deri në 10 kilometra në secilin krah të rrugës.

Bllokimi i krijuar prej orës 11:00 ka prekur dhjetëra automjete që udhëtonin drejt Tiranës dhe anasjelltas, ndërsa situata është bërë edhe më e rëndë për shkak se në zonë ka mbetur e bllokuar edhe një autoambulancë që transportonte një grua të sëmurë drejt Spitalit të Elbasanit.

Për shkak të pamundësisë për të kaluar, e sëmura është detyruar të transportohet me barelë në këmbë, duke kaluar përmes lumit në anën tjetër të rrugës.

Qytetarët e bllokuar në trafik shprehen të revoltuar për mungesën e informacionit dhe vonesat në zhbllokimin e rrugës.

“Kemi një orë e gjysmë që presim. Vijmë nga Tirana dhe po shkojmë për në Maqedoni. Nuk na kanë dhënë asnjë informacion, nuk e dimë çfarë do bëhet. Ishalla hapet rruga që të shkojmë te familjet tona”, shprehet një qytetar.

“Pesë orë kemi që presim, jemi të sëmurë. Askush nuk na ka informuar. Ç’të bëjmë?”, thotë një tjetër udhëtar.

“100 metra larg isha kur u shemb mali. Dy orë kemi që presim, besojmë që do e hapin rrugën”, shprehet një tjetër drejtues mjeti.

Në vendngjarje kanë ndërhyrë ekipet e mirëmbajtjes së firmës kontraktuese me mjete të rënda për pastrimin e aksit. Megjithatë, Prefekti i Qarkut Elbasan, Ilir Bejtja, tha se situata paraqitet e vështirë për shkak të rrëshqitjeve të vazhdueshme nga sipër kodrës.

“Rruga ka rënë totalisht pranë Dragostunjës. Po punohet nga firma që e ka në dorëzim me mjete të rënda, por problematika më e madhe është se teksa pastrohet poshtë, vijon rrëshqitja nga sipër e kodrës. Kjo e bën më të vështirë ndërhyrjen. Nëse ndalon rrëshqitja e kodrës, atëherë zhbllokimi bëhet më i lehtë. Parashikohet që bllokimi të zgjasë të paktën edhe 3 orë”, deklaroi Bejtja.

Autoritetet u bëjnë thirrje drejtuesve të mjeteve të shmangin këtë aks deri në një njoftim të dytë dhe të ndjekin informacionet zyrtare për situatën.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)