Afera e Bankers Petroleum në GJKKO, paraqiten dy ish-drejtuesit kinezë nën akuzë për shmangie tatimore

Hetimet për një nga çështjet më të mëdha financiare në sektorin e naftës në Shqipëri kanë hyrë në një fazë të re, me paraqitjen në Gjykatën e Posaçme kundër Korrupsionit dhe Krimit të Organizuar të dy ish-drejtuesve të kompanisë Bankers Petroleum.

Në seancën e sotme në Gjykata e Posaçme kundër Korrupsionit dhe Krimit të Organizuar, u paraqitën Hongping Xiao dhe Lianyi Wang, të cilët janë nën masën e sigurisë “detyrim paraqitje” dhe ndalim për të dalë jashtë vendit, vendim që zëvendësoi “arrestin në shtëpi” më 1 prill.

Sipas organit të akuzës, kompania Bankers Petroleum dyshohet se për rreth dy dekada ka shmangur detyrimet tatimore, duke i shkaktuar një dëm të konsiderueshëm buxhetit të shtetit. Hetimet tregojnë se gjatë viteve 2004–2024 janë realizuar shitje dhe eksporte nafte me vlerë rreth 532 milionë euro, ndërsa kompania ka deklaruar humbje të vazhdueshme, që në total arrijnë në rreth 11.7 miliardë.

Çështja u intensifikua pas aksionit të Prokurorisë së Fierit më 2 korrik, ku u ekzekutuan 10 masa sigurie, ndërkohë që katër shtetas të huaj mbeten ende në kërkim.

Autoritetet dyshojnë për deklarime të rreme dhe shmangie të qëllimshme të detyrimeve financiare në shkallë të gjerë, ndërsa hetimet vijojnë për zbardhjen e plotë të skemës së dyshuar.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)