Shqiptarë e maqedonas rrihen me shkopa e karrige në Itali, 11 të arrestuar

Shqiptarë dhe maqedonas janë përfshirë në një rrahje masive që shpërtheu mbrëmjen e së dielës në një lokal në zonën San Sisto, pranë spitalit Santa Maria della Misericordia në Perugia, duke çuar në arrestimin e 11 personave dhe denoncimin në gjendje të lirë të një të mituri.

Karabinierët shkuan menjëherë në vendngjarje pas një sinjalizimi për një sherr të dhunshëm mes dhjetëra personave. Të arrestuarit, të moshës nga 19 deri në 31 vjeç, me origjinë shqiptare, maqedonase dhe rumune, janë dërguar në burgun e Capanne.

Ata rezultojnë banorë në zona të ndryshme të provincës së Perugias, si Panicale, Piegaro, Passignano sul Trasimeno, Montegabbione dhe Tavernelle. Pesë prej tyre janë persona të njohur më parë për forcat e rendit, me precedentë penalë.

Sipas rindërtimit të ngjarjes nga hetuesit, përplasja ndodhi rreth orës 18:45 në një pikë karburanti në Sant’Andrea delle Fratte, ku u përballën dy grupe të rinjsh, një shqiptar dhe një maqedonas. Gjatë ndërhyrjes, forcat e rendit u përballën me një numër të madh personash që po përlesheshin me dhunë.

Dy persona arritën të largoheshin me makinë dhe gjatë arratisjes përplasën një 27-vjeçar maqedonas, i cili u shtrua në spitalin e Perugias me fraktura në gjymtyrët e poshtme dhe një prognozë prej 30 ditësh. Kërkimet për dy të arratisurit vijojnë.

Hetimet e para, të mbështetura nga dëshmitë dhe pamjet e kamerave të sigurisë, tregojnë se rrahja nisi për motive banale, konkretisht për një foto të bërë me celular, dhe më pas degjeneroi në dhunë të rëndë.

Në vendngjarje u sekuestruan shkopinj, karrige dhe tavolina të përdorura gjatë përplasjes, si edhe një sasi e vogël kokaine.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)