Aksion si në filma, kapet kamionçina plot me kanabis në 'Unazën e Madhe'

Në një operacion të denjë për filmat aksion, policia e Tiranës ka ndaluar në “Unazën e Madhe” të kryeqytetit një kamionçinë, me të cilën një 42-vjeçar po transportonte 10 kg kanabis dhe disa armë zjarri.

Policia bën me dije se është vënë në pranga Vilson Shima, prej kohësh nën survejim nga forcat e rendit për shkak të aktivitetit të tij të dyshimtë që përkonte me shitjen e lëndëve narkotike.

I gjithë operacioni është filmuar me dron dhe shihet momenti kur efektivët i presin rrugën dhe në moment e zbresin nga automjeti duke e shtrirë në tokë për t’i vendosur prangat.

Në automjetin e 42-vjeçarit, i cili nuk rezulton të ketë precedentë penalë, janë gjetur 10 kg kanabis ndërsa në banesën e tij gjatë kontrollit të ushtruar u gjetën edhe 2 armë zjarri pistoletë, 2 silenciator e municion luftarak.

Mësohet se Shima e kishte siguruar kanabisin në zonën e Baldushkut dhe do ta shiste në afërsi të zonës së njohur si ‘Kafja e Rremës’, në periferi të Tiranës.

“Specialistët për Hetimin e Krimeve të Komisariatit të Policisë Nr. 4, në vijim të punës për goditjen e veprimtarive kriminale në fushën e narkotikëve, bazuar në informacionet e siguruara në rrugë operative, për një shtetas që po transportonte lëndë narkotike me automjet dhe posedonte sende të kundërligjshme në banesë, organizuan dhe finalizuan operacionin policor të koduar “Ndalesa”. Si rezultat i operacionit, u arrestua në flagrancë shtetasi Vilson Shima, 42 vjeç, banues në Tiranë. 42-vjeçari u ndalua nga shërbimet e Policisë, në Unazë të Madhe, duke qarkulluar me një automjet, në të cilin gjatë kontrollit u gjetën, në total, 10 kg lëndë e dyshuar narkotike kanabis, që dyshohet se e posedonte me qëllim shitjen”, informon policia.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)