Hakmarrje pas pushimit nga puna, shqiptari sulmoi me molotov makinën e ish-shefes

Një shtetas shqiptar është dërguar në burg në Itali pasi akuzohet për një seri veprimesh të dhunshme ndaj ish-punëdhënëses së tij, të cilat nisën pas pushimit të tij nga puna.

Sipas mediave italiane, ngjarja ka ndodhur në zonën e Cento, në provincën e Ferrara, ku fillimisht ndaj shqiptarit ishte vendosur masa e arrestit shtëpiak, pasi në muajin gusht ai kishte hedhur një shishe molotov ndaj makinës së ish-pronares së kompanisë ku kishte punuar.

Megjithatë, në fund të shkurtit ai theu masën e sigurisë jo një, por dy herë brenda 24 orëve. Në të dy rastet, efektivët e Carabinieri e gjetën 43-vjeçarin në një bar dhe e kthyen sërish në banesë.

Situata u përkeqësua kur, në ditën kur ai duhej të paraqitej në gjykatë, policia shkoi në shtëpinë e tij për ta shoqëruar në seancë, por nuk e gjeti aty. Pas kërkimeve të menjëhershme, ai u lokalizua sërish në një tjetër bar në zonë.

Për shkak të rrezikshmërisë shoqërore dhe shkeljeve të përsëritura të masës së sigurisë, gjyqtari i Gjykata e Bolonjës vendosi rëndimin e masës dhe transferimin e tij në burgun e Ferrarës.

Sipas hetimeve, shqiptari kishte ndërmarrë një seri veprimesh hakmarrëse ndaj ish-punëdhënëses. Përveç djegies së makinës së saj me molotov, ai dyshohet edhe për një tentativë për t’i vënë flakën një furgoni të kompanisë, të cilin e kishte spërkatur me lëndë të ndezshme pa arritur ta digjte.

Prokuroria i ka ngritur gjithashtu akuza për hyrje të paligjshme në pronë dhe kërcënime të rënda ndaj viktimës.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)