Aksidenti tragjik, pezullohet nga detyra drejtori i Policisë së Durrësit

Pas aksidentit të rëndë që tronditi vendin dhe i mori jetën dy fëmijëve në Durrës, janë marrë masa të para administrative në radhët e Policisë së Shtetit. Drejtori i Policisë së Qarkut Durrës, Afrim Tafa, është pezulluar nga detyra deri në përfundim të hetimeve për zbardhjen e plotë të ngjarjes.

Vendimi vjen në vijim të reagimeve dhe hetimeve të nisura pas aksidentit të ndodhur më 3 maj në lagjen nr. 15, ku një automjet përplasi tre fëmijë që po luanin në trotuar. Si pasojë e përplasjes humbën jetën dy të mitur, ndërsa një tjetër mbeti i plagosur dhe ndodhet jashtë rrezikut për jetën.

Nga hetimet paraprake rezultoi se drejtuesi i mjetit ishte në gjendje të dehur dhe kishte precedentë të mëparshëm për shkelje të rregullave të qarkullimit rrugor. Ai u arrestua dhe ndaj tij rëndojnë disa akuza, përfshirë shkelje të rregullave të qarkullimit me pasojë vdekjen.

Ndërkohë, në vend të Tafës është emëruar përkohësisht Ervin Hodaj, i cili do të drejtojë Policinë e Durrësit deri në përfundimin e hetimeve.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)