“Ka të penduar që duhen mbrojtur”, Berisha zbulon pse po mbahet sekret dosja “Balluku”

Berisha u paraqit këtë të enjte në ambientet e Prokurorisë së Posaçme kundër Korrupsionit dhe Krimit të Organizuar, në zbatim të masës së sigurisë “detyrim paraqitje” të vendosur ndaj tij. Gjatë komunikimit me gazetarët, ai iu përgjigj pyetjes lidhur me mbajtjen sekret të dosjes “Balluku”

“Në atë dosjen ‘Balluku’, të garantoj unë ty se po të ishte Sali Berisha paditësi, do e bëja publike. Por këtu jam palë. Jam i detyruar. Aty ka dëshmitarë, bashkëpunëtorë të drejtësisë dhe unë në asnjë rrethanë nuk pranoj kurrë që ata të tradhtohen”, deklaroi ai, duke theksuar se mbrojtja e të penduarve është arsyeja kryesore e këtij qëndrimi.

Berisha shtoi se publikimi i të dhënave do të rrezikonte identitetin e dëshmitarëve dhe bashkëpunëtorëve të drejtësisë, duke nënvizuar se Partia Demokratike mbështet hetimet dhe nuk do të ndërmarrë veprime që mund t’i dëmtojnë ato.

Ndërkohë, ish-kryeministri përballet me akuza për korrupsion, ndërsa në të njëjtën çështje janë të përfshirë edhe dhëndri i tij, Jamarbër Malltezi, si dhe biznesmeni Fatmir Bektashi, të akuzuar për korrupsion dhe pastrim parash. Po ashtu, prokuroria ka ngritur akuza për përfshirje në skema pastrimi parash edhe ndaj Xhimi Begejës dhe Andia Pustinës.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)