“Prurje rekord në Kaskadën e Drinit”, Balluku për përmbytjet në vend: Në mesnatë pritet agravim i reshjeve

Kryeministri Edi Rama prej orës 08:30 ka mbledhur Komitetin Ndërqeveritar të Emergjencave në selinë e qeverisë, me fokusin tek situata e krijuar nga përmbytjet dhe reshjet e dëborës që kanë prekur disa zona të vendit.

Zv/kryeministrja Belinda Balluku gjatë raportimit të saj tha se situata e përgjithshme po mbahet nën kontroll, ndërsa theksoi se ka pasur përmirësim të furnizimit me energji elektrike në zonat e prekura nga moti i keq.

“Kemi prurje të kontrolluara dhe janë në punë të gjitha agregatet. FA dhe Aviacioni Civil kanë njoftuar se reshjet do të vijojnë edhe sot, ndërsa gjatë mesnatës presim një agravim të tyre, por kuotat na lejojnë që ta menaxhojmë situatën”, u shpreh Balluku.

Ajo bëri të ditur se autoritetet qendrore dhe vendore janë të angazhuara maksimalisht në terren, me mbështetje edhe nga bashkitë. Sipas saj, situata ka qenë më e vështirë në jug për shkak të mungesës së bimësisë, si pasojë e zjarreve të shumta gjatë verës, por ndërhyrjet kanë vijuar pa ndërprerje.

Zv/kryeministrja apeloi drejtuesit e mjeteve që në zonat me ngrica dhe borë të përdorin zinxhirë dhe goma dimërore, ndërsa konfirmoi funksionimin e pikave kyçe të transportit.

“Aeroporti i Rinasit është funksional. Kemi pasur vetëm disa devijime për shkak të stuhisë, por me reshjet e shiut situata është e menaxhuar. Edhe Porti i Durrësit është funksional, megjithatë sot në Ultësirën Perëndimore presim rritje të shpejtësisë së erës, çka mund ta bëjë më të vështirë lundrimin”, tha Balluku.

Duke folur për energjinë elektrike, ajo theksoi se situata është përmirësuar ndjeshëm në rang vendi.

“Në terren janë më shumë se 1600 punonjës. Që nga 2 janari, strukturat civile janë angazhuar në zonat më të prekura. Edhe veriu është menaxhuar. Kemi pasur disa shkëputje në Kukës dhe Librazhd, por janë rikthyer në funksion në kohë rekord. Të gjitha linjat e transmetimit janë funksionale”, deklaroi zv/kryeministrja.

Sa i përket hidrocentraleve, Balluku informoi se kaskada ka përballuar prurje rekord.

“Kaskada ka pasur prurje deri në 3000 metra kub në sekondë. Kuota e Fierzës ka arritur në 289.77 metra. Aktualisht prurjet kanë rënë në rreth 1500 metra kub në sekondë”, përfundoi ajo.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)