“Nuk kemi ende drejtësi të paanshme e cilësore”, Rama: Do vijnë ekspertë francezë

“Nuk kemi ende as një drejtësi të paanshme e as një drejtësi cilësore”, kështu u shpreh kryeministri Edi Rama në podcastin e së dielës në rrjetet sociale.

Kreu i qeverisë u shpreh se gjatë vizitës në Francë u takua me ministrin e drejtësisë me të cilin diskutoi për pjesëmarrjen e një grupi ekspertësh në diskutimet për problematikat e politikës penale në Shqipëri dhe të draftit të ri të Kodit Penal.

“Gjatë qëndrimit tim në Paris, u takova edhe me Ministrin e Drejtësisë së Francës, me të cilin diskutuam mbi pjesëmarrjen e partnerëve francezë në grupin e reflektimit që kemi nisur për problematikat e politikës penale në Shqipëri, si dhe mbi konsolidimin e draftit të ri të Kodit Penal, në harmoni të plotë me standardet dhe praktikat më të mira evropiane.

Siç e kam thënë na duhet një reflektim i madh, serioz dhe largpamës mbi politikën penale në Shqipëri, sepse duhet të adresojmë problematika të mprehta, por njëkohësisht të mbrojmë pavarësinë, të nxisim paanësinë dhe të rrisim cilësinë e drejtësisë në këtë vend, ku kemi më në fund një drejtësi të pavarur, falë lidershipit të Partisë Socialiste të Shqipërisë dhe mbështetjes bipartizane të popullit shqiptar, po nuk kemi ende as një drejtësi të paanshme e as një drejtësi cilësore. Nuk është e lehtë, por unë nuk i jam përkushtuar politikës për të bërë gjëra të lehta apo për t’i marrë lehtë gjërat e rënda. Përkundrazi”, tha Rama.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)