Protesta e opozitës, Boçi: Kryeministria simbol i korrupsionit, vjedhja nis me inceneratorët

I pari që e mori fjalën në protestën kombëtare të opozitës këtë të shtunë ishte nënkryetari i PD-së, Luçiano Boçi. Ai e hapi tubimin duke e cilësuar ndërtesën e Kryeministrisë jo si seli qeverie, por si simbol të korrupsionit dhe abuzimit me pushtetin.

“Në këtë godinë nuk është qeveria, por hajnia”, deklaroi Boçi, duke shtuar se “kjo ndërtesë nuk është kryeministria, por kuplaraja e shtetit”. Sipas tij, kryeministri Edi Rama e ka shndërruar shtetin në pronë private dhe qeverinë në një “klub të mbyllur qejfi dhe ahengu”.

Gjatë fjalës së tij, Boçi theksoi se protesta nuk ishte një shfaqje politike apo një grumbullim formal, por një reagim i ndërgjegjes qytetare. “Nuk jemi mbledhur për spektakël politik… jemi këtu sepse vlerësojmë jetën, familjen, dinjitetin dhe rezistencën”, u shpreh ai para protestuesve.

Nënkryetari i PD-së renditi si shembuj të korrupsionit aferën e inceneratorëve, projektet e tuneleve dhe aeroportet, duke theksuar se “këtu vjedhja ka emër dhe shifra”. Ai akuzoi gjithashtu krimin e organizuar dhe indiferencën politike si faktorë që, sipas tij, e kanë kthyer vendin “nga Republika e Shqipërisë në Republikën e korrupsionit”.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)