“Deri në 1 miliard euro për bujqësinë”, Rama në Divjakë: Bashkitë të bashkëpunojnë më shumë me fermerët

Me premtimin për më shumë fonde nga Bashkimi Evropian dhe një buxhet shtetëror që mund të arrijë deri në 1 miliard euro, kryeministri Edi Rama zhvilloi sot një takim me fermerët në Divjakë në kuadër të prezantimit të Skemës Kombëtare 2026, duke vënë theksin te nevoja për përgatitje, bashkëpunim dhe aktivizim të pushtetit vendor.

Gjatë fjalës së tij, Rama theksoi se financimi i bujqësisë nuk duhet parë vetëm përmes buxhetit të shtetit, por si një zinxhir mundësish më të gjera.

“Ne jemi mësuar t’i referohemi buxhetit të shtetit, por ai është vetëm një komponent. Sot në Shqipëri paratë nuk janë problem, problemi është mungesa e informacionit dhe përgatitjes për t’i thithur ato”, tha kryeministri.

Ai shtoi se fondet nga BE do të rriten, por kërkoi angazhim më të madh për t’i përfituar ato.

“Fonde nga BE do të kemi më shumë, por duhet të jemi të aftë që t’i thithim. Kemi vënë në dispozicion të bujqësisë 250 milionë euro, që mund të shkojnë edhe në 1 miliard, nëse konsumohen.”

Rama u ndal edhe te roli i bashkive, duke kërkuar më shumë bashkëpunim me fermerët.
“Kryetarët e bashkive duhet të jenë më aktivë. Nuk duhet të ketë asnjë pengesë për agro-përpunim, mekanikë apo investime të tjera që i shërbejnë zonave bujqësore”, theksoi ai.

Sipas kryeministrit, kreditë me garanci shtetërore dhe interesa të ulëta janë një tjetër mundësi konkrete për të nxitur zhvillimin e sektorit bujqësor.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)