Seanca paraprake në GJKKO, Kryemadhi: Do dalin mesazhet e mia me Ramën për Veliajn, si ia futëm Ilir Metës

Seanca paraprake ndaj ish-Presidentit Ilir Meta, ish-bashkëshortes së tij Monika Kryemadhi dhe tre të pandehurve të tjerë, u finalizua këtë të enjte pas disa seancash të dështuara, radhazi.

Para trupës gjykuese u paraqit edhe Monika Kryemadhi, e cila kërkoi pushimin e çështjes ose, në alternativë, kthimin e akteve për hetim të mëtejshëm, ndërsa të njëjtën kërkesë kishte paraqitur më herët edhe Meta. Ndërsa nëna e saj Fatime Kryemadhi, si dhe Ema Çoku dhe Piro Xhixho, përmes avokatëve kërkuan pushimin e çështjes në ngarkim të tyre.

Pas daljes nga ambientet e GJKKO-së, Kryemadhi mohoi sërish akuzat e ngritura nga Prokuroria e Posaçme, duke theksuar se pjesa më e madhe e dosjes hetimore është përqendruar tek ajo.

“Në 240 faqe akuzë që janë paraqitur, 35 janë për CEZ-DIA-n për Ilir Metën dhe gjithë pjesa tjetër është e detajuar dhe është fokusuar te unë”, u shpreh ajo.

Ish-kryetarja e LSI-së deklaroi se po shkon drejt një beteje ligjore shumë domethënëse, ndërsa shtoi se ekspertiza e prokurorisë do të verifikojë mesazhet e saj me kryeministrin Edi Rama, të realizuara në vitin 2014.

“Do i shohim të gjitha, ose si kemi zgjedhur Erion Veliaj kryetar bashkie, ja kemi futur Ilir Metës se donte Blendi Klosin, unë desha Erion Veliajn”, deklaroi Kryemadhi para mediave, duke nënvizuar se është e lumtur që do të dalin këto biseda.

Sakaq, vendimin për kalimin ose jo të çështjes për gjykim gjyqtarja Irena Gjoka, do ta shpallë më 5 mars.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)