Milani përmbys Torinon, kapiten "Amerika" rikthen kuqezinjtë në krye të Seria A

Christian Pulisic ishte heroi i Milanit, duke shënuar dy gola vendimtarë në përmbysjen spektakolare 3-2 ndaj Torinos, pas një disavantazhi fillestar 2-0.

Trajneri Massimiliano Allegri e ndoqi ndeshjen nga tribunat për shkak të pezullimit, ndërsa skuadra e tij u gjend shpejt në vështirësi. Nikola Vlašić shënoi i pari nga penalltia në minutën e 10-të, pasi Fikayo Tomori preku topin me dorë në zonë.

Vetëm pak minuta më vonë, Duván Zapata dyfishoi rezultatin me një goditje të fuqishme që kaloi përmes duarve të Maignan, duke shënuar golin e tij të tetë kundër Milanit.

Drita në fund të tunelit për Milanin në pjesën e parë erdhi nga një supergol i Adrien Rabiot, i cili me një goditje të harkuar dhe precize e dërgoi topin në trekëndësh, duke ngushtuar diferencën në 2-1.

Milan e nisi pjesën e dytë më agresivisht, me portierin Franco Israel që ndali fillimisht një goditje me kokë të Bartesaghi dhe më pas tentativën e Riccit. Por hyrja e Christian Pulisic ndryshoi ndeshjen. Amerikanit i mjaftuan vetëm pak sekonda në fushë për të barazuar rezultatin në minutën e 67-të, pas një topi të gjetur në zonë.

Dhjetë minuta më vonë, Pulisic kompletoi përmbysjen me një goditje të saktë pas një krosi perfekt nga Ricci, duke u bërë golashënuesi i përbashkët më i mirë në kampionat.

Me këtë fitore, Milani ngjitet sërish në krye, ndërsa Torino vazhdon krizën, duke regjistruar gjashtë ndeshje rresht pa fitore në Serie A.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)