Albacete turpëron Realin, “mbretërorët” eliminohen nga Kupa

Kupa e Mbretit konfirmoi momentin e vështirë të Realit të Madridit. Pas shkarkimit të trajnerit Xabi Alonso dhe emërimit në stol të Arbeloa-s, “Los Blancos” u eliminuan nga turneu.

Surpriza e madhe u realizua nga modestët e Albacete-s. Skuadra e cila po lufton që të mbijetojë në Ligën e Dytë spanjolle, i mposhti me rezultatin 3-2. Një disfatë e rëndë për Realin, që shënon një fillim shumë negativ për epokën pas largimit të Alonsos.

Në ndeshjen e parë nën drejtimin e Álvaro Arbeloa-s, trajneri i ri i vendosi që disa titullarë të qëndronin pushim. Mes tyre ishin Mbappé dhe Bellingham, ndërsa në fushë nga minuta e parë u aktivizua Vinicius Junior. Megjithatë, këto zgjedhje nuk dhanë rezultat.

Albacete kaloi në avantazh në minutën e 42-të me golin e Villar, ndërsa Reali barazoi në fund të pjesës së parë falë Mastantuono-s. Në pjesën e dytë protagonisti absolut ishte Betancor, i cili shënoi dy gola, në minutën e 82-të dhe në të 94-tën, duke vulosur eliminimin e madrilenëve. Rrjeta e Gonzalo Garcia në minutën e 91-të, që solli barazimin e përkohshëm 2-2, rezultoi e pamjaftueshme.

Me këtë humbje, Reali i Madridit eliminohet përpara kohe nga Kupa e Mbretit. Debutimi i Arbeloa-s në rol hyn në histori si një nga më zhgënjyesit gjatë viteve të fundit në klubin mbretëror.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)