“Kryqëzohet” Gianni Infantino pas deklaratës për heqjen e pezullimit ndaj Rusisë

Një deklaratë e presidentit të FIFA-s, Gianni Infantino, ka shkaktuar reagime të forta dhe zemërim në Ukrainë, duke rikthyer në qendër të debatit rolin e sportit përballë luftës dhe agresionit politik.

Infantino u përball me kritika pasi deklaroi se dëshiron t’i japë fund ndalimit të Rusisë nga garat ndërkombëtare të futbollit, një masë e vendosur nga FIFA dhe UEFA pas nisjes së pushtimit rus të Ukrainës në vitin 2022. Sipas tij, ndalimi “nuk ka arritur asgjë” dhe ka krijuar vetëm “më shumë frustrim dhe urrejtje”, duke shtuar se futbolli nuk duhet të ndëshkojë vendet për veprimet e liderëve të tyre politikë.

Reagimi më i ashpër erdhi nga ministri i Jashtëm i Ukrainës, Andrij Sibiha, i cili e cilësoi Infantinon se bëri një deklaratë pa moral, duke theksuar se qindra fëmijë ukrainas nuk do të kenë më kurrë mundësi të luajnë futboll pasi janë vrarë nga agresioni rus. Ai paralajmëroi se historia do ta kujtojë këtë qasje si një “turp të përmasave botërore”.

Edhe ministri ukrainas i Sportit, Matvij Bidnij, kritikoi ashpër qëndrimin e kreut të FIFA-s, duke e quajtur atë të shkëputur nga realiteti tragjik i luftës. Ai solli shembuj konkretë të sportistëve të rinj ukrainas që kanë humbur jetën si pasojë e sulmeve ruse.

Federata e Futbollit e Ukrainës i bëri thirrje FIFA-s të mos ndryshojë qëndrim për aq kohë sa lufta vazhdon, duke theksuar se përjashtimi i Rusisë mbetet një formë e rëndësishme presioni ndërkombëtar.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)