Botërori 2026: Ja kush mund ta zëvendësojë Iranin, mbeten shumë pasiguri dhe pikëpytetje

Tërheqja e përfaqësueses së Iranit nga Botërori 2026 ka hapur një skenar të papritur në futbollin ndërkombëtar. Konflikti në Lindjen e Mesme dhe situata e tensionuar gjeopolitike kanë ndryshuar planet fillestare. Ministri iranian i Sportit, Ahmad Donyamali deklaroi se kombëtarja nuk do të udhëtojë drejt Shteteve të Bashkuara, ku në qytetet Los Angeles dhe Seattle duhej të luante ndeshjet e grupit G kundër Zelandës së Re, Belgjikës dhe Egjiptit.

Pavarësisht qëndrimit të Teheranit, fjalën e fundit do ta thotë FIFA. Nëse ky vendim bëhet zyrtar, qeveria e futbollit botëror duhet të vendosë se cila skuadër do ta zëvendësojë Iranin në event. Rregullorja e FIFA-s nuk jep një përgjigje të qartë për raste të tilla. Sipas nenit 6.7, organizata ka të drejtën të vendosë sipas gjykimit të saj ekskluziv dhe të marrë çdo masë që e konsideron të nevojshme, përfshirë edhe zëvendësimin e federatës pjesëmarrëse me një tjetër.

Kjo lë hapësirë të madhe interpretimi dhe pritet që FIFA të marrë një vendim nëse tërheqja e Iranit konfirmohet përpara fillimit të turneut. Një nga opsionet më të mundshme është Iraku, i cili konsiderohet si kombëtarja e parë jashtë zonës së kualifikimit në Konfederatën Aziatike. Më 31 mars është planifikuar ndeshja “play-off” ndërmjet Irakut dhe fitueses së përballjes Bolivi–Surinam.

Megjithatë, edhe kjo sfidë është e rrethuar nga pasiguri, pasi duhet të zhvillohet në Monterrey të Meksikës, ndërsa Iraku po përballet me probleme serioze logjistike për shkak të mbylljes së hapësirës ajrore si pasojë e luftës në Lindjen e Mesme. Për këtë arsye, federata irakene ka kërkuar shtyrjen e ndeshjes “play-off”.

Nëse tërheqja e Iranit konfirmohet para zhvillimit të këtyre ndeshjeve, FIFA mund të vendosë që Iraku të kualifikohet drejtpërdrejt në Botëror, ndërsa vendin e tij në “play-off” ta marrë kombëtarja e Emirateve të Bashkuara Arabe, e cila renditet menjëherë pas Irakut. Raste të ngjashme janë shumë të rralla në historinë e futbollit, ndërsa një precedent i njohur mbetet Euro 1992, kur Danimarka zëvendësoi Jugosllavinë dhe në fund fitoi turneun.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)