Shqipëria konsiderohet surprizë në “play-off”, por statistikat nuk na favorizojnë

Kombëtarja shqiptare është gati për ndeshjen më të rëndësishme në histori. Kuqezinjtë do të luajnë sfidën vendimtare ndaj Polonisë, në gjysmëfinalet e “play-off” të Kupës së Botës 2026. Megjithatë, parashikimet bazuar në statistika nuk janë plotësisht në favor të kuqezinjve.

Sipas analizës së publikuar nga faqja e specializuar “Football Meets Data” në rrjetin X, Polonia, kundërshtare e Shqipërisë në ndeshjen e 26 marsit mbetet favorite. Kualiteti i skuadrës, eksperienca dhe faktori fushë bëjnë që rivalët të kenë 68% shanse për të arritur në finalen e “play-off”-it. Megjithatë, Kombëtarja kuqezi cilësohet si surpriza e kësaj faze dhe ka 32% shanse për të vijuar ëndrrën.

Statistikat bien në mënyrë të ndjeshme në rast se kualifikohemi në finale, ku skuadra e drejtuar nga Sylvinho do të përballet me fituesin e çiftit Ukrainë-Suedi. Shanset e Shqipërisë për të siguruar biletën në Botërorin 2026 vlerësohen në vetëm 11%. Gjithsesi kuqezinjtë do të provojnë që të përmbysin pritshmëritë dhe të shkruajnë historinë.

Sipas përllogaritjeve të bazuara në statistika, Kosova i ka shanset më të mira se kuqezinjtë. Fitorja e Dardanëve në gjysmëfinale kundër Sllovakisë jepet me 41% shanse, ndërsa triumfi në finalen e “play-off” dhe pjesëmarrja në finalet e Kupës së Botës përllogariten në kuotën 20%.

Foto ilustruese

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)