NASA kërkon të “pushtojë” Hënën, gati plani për bazën e parë

NASA ka publikuar planet për dërgimin e robotëve, dronëve dhe automjeteve speciale në Hënë, si pjesë e projektit amerikan për ndërtimin e një baze të përhershme në satelitin e Tokës.

Shtetet e Bashkuara synojnë të rikthejnë astronautët në Hënë përpara përfundimit të mandatit të presidentit Donald Trump në vitin 2029. Por NASA po përballet me konkurrencë të fortë nga Kina, e cila planifikon të dërgojë njerëz në Hënë deri në vitin 2030.

Në këtë projekt janë përfshirë kompani të mëdha hapësinore si Blue Origin, në pronësi të Jeff Bezos, si dhe SpaceX, Intuitive Machines dhe Astrobotic.

Sipas planit të NASA-s, fillimisht do të dërgohen mjete robotike për të eksploruar polin jugor të Hënës, ku besohet se ka rezerva uji të ngrirë. Ky ujë mund të përdoret për furnizim me oksigjen, ujë të pijshëm dhe prodhim karburanti për misionet e ardhshme drejt Marsit.

Blue Origin do të ndërtojë mjetin hënor “Endurance”, i cili do të kryejë ulje precize dhe lëvizje autonome në sipërfaqen e Hënës. Ndërsa kompania Astrobotic do të dërgojë mjetin “Griffin-1” pranë kraterit Nobile në polin jugor.

Programi i NASA-s për bazën hënore parashikon tre faza kryesore. Deri në vitin 2029 do të kryhen misione robotike dhe transport pajisjesh shkencore. Më pas do të ndërtohen sisteme energjie diellore dhe bërthamore, ndërsa deri në vitin 2032 synohet krijimi i banesave gjysmë të përhershme për astronautët.

Megjithatë, ekspertët janë skeptikë për realizimin e afateve. Shkencëtarë të fushës së hapësirës theksojnë se sfida më e madhe mbetet ndërtimi i një anijeje të sigurt për uljen e njerëzve në Hënë.

Aktualisht, SpaceX po zhvillon anijen “Starship Human Landing System”, por projekti është përballur me vonesa dhe probleme teknike.

Ndërkohë, Kina po avancon me shpejtësi në programin e saj hapësinor. Së fundmi, ajo lëshoi anijen kozmike Shenzhou-23 drejt stacionit hapësinor Tiangong, duke shtuar rivalitetin në garën e re për Hënën.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)