Ura gjigante që “sfidon” oqeanin, mega-projekti 55 kilometra

Kina vazhdon të mahnisë botën me projektet e saj gjigante infrastrukturore, ndërsa një nga veprat më spektakolare të inxhinierisë moderne mbetet ura Hong Kong-Zhuhai-Makao, struktura detare më e madhe në planet.

E inauguruar në vitin 2018, kjo urë lidh tre qytete të rëndësishme aziatike, Hong Kong, Zhuhai dhe Makao, duke reduktuar kohën e udhëtimit mes tyre nga rreth tre orë në vetëm 30 minuta. Projekti ka një gjatësi totale prej 55 kilometrash dhe konsiderohet një nga ndërtimet më ambicioze të shekullit.

Ndërtimi i saj nisi në vitin 2009 dhe përfundoi në vitin 2017, ndërsa hapja zyrtare u bë një vit më vonë. Kostoja totale e projektit kaloi mbi 18 miliardë euro, shumë më e lartë se parashikimet fillestare, gjë që shkaktoi debate të shumta në Kinë.

Ajo që e bën edhe më të veçantë këtë urë është fakti se një pjesë e saj kalon nën ujë përmes një tuneli nëndetar 6.7 kilometra të gjatë. Ky segment u ndërtua për të mos penguar trafikun intensiv detar në deltën e lumit Pearl, një nga zonat më të ngarkuara tregtare në Azi.

Hyrja dhe dalja në tunelin nënujor realizohen përmes dy ishujve artificialë të ndërtuar posaçërisht për projektin. Inxhinierët u përballën me sfida të mëdha, pasi zona karakterizohet nga aktivitet sizmik dhe kushte të vështira klimatike.

Ekspertët vlerësojnë se ura do të ketë një jetëgjatësi minimale prej 120 vitesh. Përveç ndikimit ekonomik dhe transportit më të shpejtë, projekti konsiderohet simbol i fuqisë teknologjike dhe ambicies infrastrukturore të Kinës.

Sipas kompanisë që administron urën, ajo pritet të bëhet plotësisht fitimprurëse brenda rreth 30 viteve, ndërsa çdo ditë mijëra automjete e përdorin për të lëvizur mes tre qyteteve kryesore të rajonit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)