Inteligjenca Artificiale realizon të pamundurën, mund të identifikojë sinjalet që paraprijnë tërmetet

Parashikimi i tërmeteve ka qenë prej dekadash një nga sfidat më të mëdha dhe më të vështira të shkencave të Tokës. Pavarësisht kërkimeve të shumta ndërkombëtare, shkencëtarët ende nuk kanë arritur të zbulojnë me saktësi sinjalet që tregojnë kur dhe sa shkatërrues mund të jetë një tërmet. Aktualisht, një tërmet nuk mund të parashikohet me siguri.

Megjithatë, një ndihmë e rëndësishme mund të vijë nga Inteligjenca Artificiale, e cila po tregon aftësi për të njohur automatikisht sinjalet që paraprijnë një lëkundje sizmike përmes analizës së të dhënave të lidhura me lëvizjen e çarjeve tektonike. Zhvillimi i fundit bazohet në “machine learning”, një metodë e avancuar e Inteligjencës Artificiale që funksionon pa udhëzime të paracaktuara dhe është në gjendje të identifikojë ngjashmëri apo struktura të përsëritura në të dhënat që paraprijnë një tërmet.

Një grup shkencëtarësh analizoi të dhënat e pesë tërmeteve më të mëdha në botë, të cilat nuk ishin paraprirë nga asnjë aktivitet sizmik paralajmërues. Algoritmi përpunoi dhe klasifikoi të gjitha informacionet, duke i grupuar në kategori të ndryshme dhe duke identifikuar elementët që kishin ndryshuar përpara goditjes së tërmetit.

Edhe pse ky sistem ende nuk mund të parashikojë saktësisht një tërmet, ai ka ndihmuar studiuesit të kuptojnë më mirë se cilët indikatorë duhet të monitorohen në të ardhmen për të zhvilluar metoda më efikase paralajmërimi. Sipas studiuesve, analiza e realizuar nga AI me teknika shumë të avancuara përpunimi mund të përmirësojë ndjeshëm kuptimin e fenomeneve fizike që ndikojnë në evolucionin e çarjeve tektonike dhe që paraprijnë tërmetet.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)