Përvjetori i 35-të i PS-së, Rama nga Korça: Nga dhuna e vitit ’96, te rruga europiane e Shqipërisë

Kryeministri Edi Rama zgjodhi qytetin e Korçës për të kujtuar përvjetorin e 35-të të Partisë Socialiste, duke sjellë në vëmendje dy ngjarje të ndodhura në të njëjtën datë, më 26 maj, por që sipas tij simbolizojnë dy realitete krejt të kundërta për Shqipërinë. Në fjalën e mbajtur përpara mbështetësve socialistë, Rama rikujtoi zgjedhjet e vitit 1996, periudhë që ai e cilësoi si një nga momentet më të errëta politike në vend, ku opozita e asaj kohe përballej me presion, dhunë dhe manipulim të procesit zgjedhor.

Shefi i qeverisë tha se socialistët në atë periudhë u goditën nga një pushtet që kishte humbur standardet demokratike dhe përdorte forcën për të mbajtur kontrollin politik. “26 maji i vitit 1996 mbetet një kujtesë e hidhur për mënyrën se si trajtohej opozita në Shqipëri. Ishte një kohë kur përballja politike shoqërohej me dhunë dhe frikë”, deklaroi Rama gjatë aktivitetit në Korçë.

Foto: Edi Rama/Facebook

Ai krahasoi atë periudhë me zhvillimet e fundit të vendit në raport me Bashkimin Europian, duke theksuar se Shqipëria sot ndodhet në një fazë krejt tjetër dhe më pranë integrimit europian. Sipas kryeministrit, data 26 maj tashmë lidhet edhe me arritjet e vendit në procesin drejt Europës, duke shtuar se Shqipëria ka fituar më shumë respekt dhe vlerësim ndërkombëtar.

“Para pak ditëve, pikërisht më 26 maj, Partia Socialiste e ngjiti Shqipërinë edhe një majë më lart, në majën që kemi amanet nga të parët tanë, ku gjendet shtëpia e Europës së Bashkuar. Sot ia kemi ngritur kokën çdo shqiptari kudo në botë”, nënvijëzoi Rama. Kryeministri theksoi se rruga europiane mbetet objektivi kryesor i qeverisë dhe se, sipas tij, transformimi i vendit në këto vite është dëshmi e ndryshimeve të mëdha që ka kaluar Shqipëria.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)