Mbyllet burgu famëkeq në Venezuelë, amnisti për të burgosurit politikë

Autoritetet venezuelane kanë njoftuar miratimin e një amnistie të përgjithshme për të gjithë të burgosurit politikë, që aktualisht ndodhen në paraburgim ose nën procese gjyqësore. Lajmi u bë i ditur nga presidentja në detyrë, Delcy Rodríguez, gjatë një aktiviteti zyrtar të mbajtur në Gjykatën e Lartë.

Sipas raportimeve të përditshmes spanjolle “El País”, Rodríguez deklaroi se ligji i amnistisë do t’i paraqitet Asamblesë Kombëtare me synimin për të nxitur pajtimin dhe bashkëjetesën në vend. Ajo u bëri thirrje qytetarëve të shmangin dhunën dhe hakmarrjen, duke theksuar se vendimi është diskutuar edhe me Nicolás Maduro.

Amnistia pritet të përfshijë qindra të burgosur politikë, shumë prej të cilëve janë arrestuar gjatë qeverisjeve të Hugo Chávez dhe Nicolás Maduro. Një pjesë e tyre ndodhen ende në procese gjyqësore. Njoftimi erdhi rreth një muaj pas nisjes së lirimeve të para, të cilat filluan pas arrestimit të Nicolás Maduro më 3 janar nga forcat amerikane.

Sipas autoriteteve venezuelane, mbi 800 persona janë liruar, ndërsa organizatat për mbrojtjen e të burgosurve raportojnë rreth 300 të liruar. Në të njëjtën kohë, presidentja Rodríguez njoftoi se “El Helicoide”, një nga burgjet më famëkeqe dhe simbol i represionit politik në Venezuelë, do të transformohet në një qendër sociale dhe sportive për punonjësit e policisë dhe familjet e tyre.

Gjatë fjalës së saj, Rodríguez përmendi edhe historinë personale të familjes, duke kujtuar të atin, i cili sipas saj ka humbur jetën në burg si pasojë e torturave. Ajo theksoi rëndësinë e respektimit të Kushtetutës, sovranitetit kombëtar dhe forcimit të garancive ligjore për qytetarët venezuelanë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)