Burgoset në SHBA, “Zoti” italian i luftës, trafikonte armë amerikane në Rusi

Një tregtar armësh nga Italia është arrestuar dhe ndodhet në një burg federal në Shtetet e Bashkuara, i akuzuar për eksport të paligjshëm armësh dhe municionesh drejt Rusisë gjatë luftës në Ukrainë.

Sipas hetimeve të FBI, 61-vjeçari Manfred Gruber dyshohet se ka organizuar një rrjet ndërkombëtar për furnizimin e Rusisë me municione të prodhimit amerikan, duke anashkaluar kufizimet ligjore të eksportit. Vlera e municioneve të trafikuara arrin mijëra dollarë.

Hetimet zbuluan se Gruber përdorte kompani në Itali për të kaluar fillimisht mallin në mënyrë të ligjshme, për ta ridrejtuar më pas përmes shoqërive të ndërmjetme drejt Kirgistanit dhe në fund në Rusi. Autoritetet amerikane theksojnë se ai ka shfrytëzuar boshllëqet në sistemin e licencimit për të realizuar skemën.

Arrestimi i tij u krye ndërsa po udhëtonte drejt Uashingtonit për të marrë pjesë në një panair të industrisë ushtarake. Më pas, ai u paraqit para një gjykate federale në Brooklyn, ku pranoi fajësinë për komplot në shkelje të ligjeve mbi kontrollin e eksporteve.

Në dosjen hetimore janë përfshirë edhe mesazhe të shkëmbyera me bashkëpunëtorë, ku diskutohej mënyra e shpërndarjes së dërgesave në mënyrë të fragmentuar për të shmangur zbulimin.

Në këtë çështje është dënuar edhe një bashkëpunëtor i tij nga Kirgistani, i cili ka marrë 39 muaj burg për shkelje të ligjeve amerikane të eksportit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)