Negociatat SHBA-Iran, Moska iu kërkon palëve të jenë të përgjegjshme: Ka forca që po pengojnë

Rusia iu ka bërë thirrje të gjitha palëve të përfshira në negociatat e paralajmëruara në Pakistan që të tregojnë përgjegjësi dhe të shmangin çdo veprim që mund të dëmtojë procesin e paqes në Lindjen e Mesme.

Në një deklaratë zyrtare, Ministria e Jashtme ruse thekson se është e rëndësishme që të shfrytëzohet mundësia e krijuar për dialog mes SHBA dhe Iranit dhe të mos ndërmerren hapa që mund të minojnë përpjekjet diplomatike.

Moska shpreh gatishmërinë për të bashkëpunuar ngushtë me partnerët ndërkombëtarë, me synim nxitjen e një procesi konstruktiv paqeje dhe stabilizimin e situatës në rajon.

Megjithatë, në deklaratë theksohet se ekzistojnë forca që po pengojnë këtë proces, duke krijuar, qëllimisht ose jo, pengesa në rrugën drejt paqes.

Diplomacia ruse vë në dukje në mënyrë të veçantë se vendet që, sipas saj, kanë nisur agresionin ndaj Iranit dhe që tani e akuzojnë Teheranin për problemet në lundrimin në Ngushticën e Hormuzit, nuk duhet të fshehin mënyrën se si janë zhvilluar realisht ngjarjet.

Sipas Moskës, deri më 28 shkurt kjo rrugë e rëndësishme detare funksiononte normalisht dhe pa ndërprerje, duke sugjeruar se tensionet aktuale janë pasojë e zhvillimeve të mëvonshme në rajon.

Deklarata vjen në një moment të ndjeshëm, kur pritet që negociatat në Pakistan të luajnë një rol kyç në përpjekjet për uljen e tensioneve dhe arritjen e një marrëveshjeje të qëndrueshme në Lindjen e Mesme.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)