Sulmohet me dronë personeli i ambasadës amerikane në Bagdad

Një sulm me dronë ka vënë në shënjestër personelin e ambasadës së Shteteve të Bashkuara në Bagdad, në një tjetër episod tensioni në rajon mes përshkallëzimit të konfliktit në Lindjen e Mesme.

Sipas një zyrtari të Departamentit Amerikan të Shtetit, sulmi ka ndodhur pranë Aeroportit Ndërkombëtar të Bagdadit, ku një milici e armatosur irakiane ka përdorur disa dronë për të goditur objektivat amerikane.

Zyrtari nuk ka bërë të ditur se cila organizatë qëndron pas sulmit, por ka theksuar se i gjithë personeli amerikan është i sigurt.

Ngjarja vjen në një moment të tensionuar, pasi që nga nisja e konfliktit mes Shteteve të Bashkuara, Izraelit dhe Iranit, janë regjistruar dhjetëra sulme ndaj interesave amerikane në Irak.

Sipas të njëjtave burime, këto sulme dyshohet se janë kryer nga grupe të armatosura që mbështeten ose janë të lidhura me Iranin, duke rritur shqetësimet për një përshkallëzim më të gjerë të konfliktit në rajon.

Autoritetet amerikane janë duke monitoruar nga afër situatën, ndërsa nuk përjashtohet mundësia e reagimeve të mëtejshme nëse sulmet vazhdojnë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)