Përmbytje të fuqishme në Nju Jork, reshje ekstreme dhe kaos në qytet

Qyteti i Nju Jorkut është goditur nga stuhi të forta dhe reshje të dendura shiu që kanë shkaktuar përmbytje të menjëhershme, bllokime rrugësh dhe kaos në transportin urban.

Sipas autoriteteve dhe meteorologëve, reshjet e shoqëruara me erëra që arritën deri në 90 km në orë kanë goditur veçanërisht zonën e Queensit, ku u regjistruan rreth 65 mm reshje shiu në një kohë të shkurtër. Përmbytjet qenë aq të shpejta saqë shumë shoferë u bllokuan në rrugë dhe disa prej tyre u detyruan të ngjiten mbi automjetet e tyre për të shpëtuar.

Në disa zona, trafiku është pezulluar për shkak të nivelit të lartë të ujit.

Probleme janë raportuar edhe në transportin publik, ku disa linja metroje janë ndërprerë, duke vështirësuar lëvizjen e mijëra qytetarëve që po ktheheshin nga puna.

Stuhia është shoqëruar edhe me rrëzime pemësh në disa lagje dhe dëmtime të infrastrukturës, ndërsa disa zona kanë mbetur pa energji elektrike.

Autoritetet paralajmërojnë se temperaturat do të vazhdojnë të bien në ditët në vijim, ndërsa moti i paqëndrueshëm pritet të vijojë edhe gjatë fundjavës së Ditës së Përkujtimit duke e bërë të pamundur rikthimin e kushteve normale në afat të shkurtër.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)