Makina e shërbimit dëmton avionin e kryeministrit sllovak në Bruksel

Avioni zyrtar i kryeministrit të Sllovakisë, Robert Fico, u dëmtua rëndë në aeroportin e Brukselit, duke shkaktuar vonesa të konsiderueshme dhe ndryshime në agjendën e delegacionit sllovak.

Sipas njoftimeve zyrtare, incidenti ndodhi gjatë operacioneve në pistë, kur një mjet shërbimi me shkallë për pasagjerë u përplas me aeroplanin. Përplasja i shkaktoi dëme serioze trupit të mjetit ajror, duke e bërë atë të papërshtatshëm për fluturim.

Kryeministri Fico reagoi përmes rrjeteve sociale, duke sqaruar se ngjarja ndodhi në fillim të një samiti të rëndësishëm në Bruksel, çka e vështirësoi edhe më tej një agjendë tashmë të ngarkuar. Ai theksoi se për shkak të dëmtimeve, delegacioni u detyrua ta linte aeroplanin në aeroportin e Brukselit.

Autoritetet aeroportuale pritet të nisin një hetim për të zbardhur rrethanat e incidentit dhe për të vlerësuar nëse janë respektuar procedurat standarde të sigurisë gjatë shërbimeve në pistë. Ngjarja ka ngritur pikëpyetje lidhur me masat e sigurisë dhe koordinimin e shërbimeve tokësore në aeroport.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)