Alarmi i Europol: Kriza në Iran, rrezik nga sulmet terroriste dhe kibernetike në BE

Agjencia europiane e policisë Europol ka paralajmëruar se përshkallëzimi i krizës në Lindjen e Mesme mund të ketë pasoja të drejtpërdrejta për sigurinë e Bashkimit Europian. Kjo rrit rrezikun e sulmeve terroriste, krimit të organizuar dhe sulmeve kibernetike.
Sipas zëdhënësit të Europol, Jan Orth, situata e tensionuar në rajon mund të ndikojë drejtpërdrejt në sigurinë e vendeve të BE. Ai theksoi se ekziston mundësia e një rritjeje të aktivitetit të ekstremizmit të dhunshëm, krimit të rëndë dhe sulmeve kibernetike ndaj infrastrukturës europiane.
Në një intervistë për agjencinë spanjolle të lajmeve EFE, Orth paralajmëroi gjithashtu për shtimin e mashtrimeve online, të cilat po bëhen gjithnjë e më të sofistikuara për shkak të përdorimit të Inteligjencës Artificiale. Sipas tij, grupet kriminale po shfrytëzojnë sasinë e madhe të informacionit që qarkullon në internet lidhur me krizën në Lindjen e Mesme për të zhvilluar skema të reja mashtrimi.
Ai shtoi se grupe të lidhura me Iran mund të përpiqen të kryejnë veprime destabilizuese në territorin e BE-së. Këto grupe lidhen me të ashtuquajturin “Bosht i Rezistencës”, një rrjet organizatash paramilitare shiite që veprojnë në vende si Irak, Liban dhe Jemen.
Sipas Europol, aktivitetet e mundshme mund të përfshijnë sulme terroriste, fushata frikësimi, financim të terrorizmit si dhe operacione të avancuara të krimit kibernetik, duke rritur ndjeshëm sfidat e sigurisë për vendet evropiane.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)