Masakra në Sidnei, rritet bilanci i viktimave, qytetari hero çarmatosi një nga autorët (video)

Ka shkuar në 12 numri i viktimave nga sulmi i armatosur që ndodhi në Bondi Beach, në periferi lindore të Sidneit, gjatë festimeve të Hanukkah, ku rreth 2 mijë anëtarë të komunitetit hebraik ishin mbledhur për të ndezur qiriun e parë të festës.

Mes të vrarëve ndodhet edhe rabini i njohur i Sidneit, Eli Schlanger, konfirmuan autoritetet lokale.

Komisari i Policisë së Uellsit të Ri Jugor, Mal Lanyon, e ka cilësuar ngjarjen si një akt terrorist, duke bërë të ditur se 29 persona të tjerë kanë mbetur të plagosur, disa prej tyre në gjendje kritike.

Sipas dëshmive paraprake, sulmi u krye nga persona të armatosur që zbritën nga një automjet në Campbell Parade dhe hapën zjarr drejt turmës.

Sipas burimeve policore dhe dëshmitarëve në vendngjarje, një qytetar civil ka treguar guxim të jashtëzakonshëm, duke arritur të çarmatosë njërin nga autorët gjatë kaosit, çka mendohet se ka parandaluar një bilanc edhe më tragjik. Autoritetet po hetojnë rolin e tij dhe rrethanat e sakta të ndërhyrjes.

Policia njoftoi se dy persona janë arrestuar, ndërsa operacioni i sigurisë vazhdon dhe qytetarët janë këshilluar të shmangin zonën e Bondi Beach. Kryeministri i Uellsit të Ri Jugor, Chris Minns, deklaroi se “sulmi ishte i projektuar për të goditur drejtpërdrejt komunitetin hebraik të Sidneit”.

Autoritetet australiane kanë rritur nivelin e sigurisë në të gjithë vendin, ndërsa hetimet për motivet dhe rrjetin e mundshëm pas sulmit janë ende në vazhdim.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)