“Situata mund të përshkallëzohet”, Ambasada amerikane apel qytetarëve para protestës së PD: Shmangni zonat e tubimit

Ambasada e Shteteve të Bashkuara në Tiranë ka shpërndarë një njoftim sigurie për qytetarët amerikanë, në prag të protestës së thirrur nga Partia Demokratike. Tubimi do të zhvillohet pasditen e kësaj të premteje në kryeqytet, duke nisur prej orës 19:00.

Në njoftim theksohet se tubimi mund të shtrihet edhe në zona të tjera përreth bulevardit “Dëshmorët e Kombit”, ndërsa pritet prani e shtuar e forcave të policisë, bllokime rrugësh dhe kufizime të qarkullimit para dhe gjatë zhvillimit të protestës.

Ambasada njoftoi se personeli i saj është udhëzuar të mos afrohet në zonën ku do të zhvillohet protesta. Gjithashtu, qytetarëve amerikanë u kërkohet të shmangin pjesëmarrjen në aktivitet dhe të tregojnë kujdes të shtuar gjatë lëvizjes në Tiranë.

“Edhe pse protestat dhe grumbullimet e mëdha shpesh nisin në mënyrë paqësore, situata mund të ndryshojë shpejt”, thuhet në paralajmërimin e Ambasadës Amerikane në Tiranë. Në këshillat e publikuara, ambasada u rekomandon qytetarëve të shmangin zonat ku ka protesta, të jenë vigjilentë ndaj situatës përreth, të ndjekin informacionet e mediave lokale, të kenë një plan emergjence apo rrugë alternative largimi dhe të ruajnë një profil të ulët në publik.

Foto: Ambasada e SHBA

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)