“Burgu ose ferri për trafikantët”, Ekuadori nxjerr 10.000 ushtarë për të luftuar kartelet e drogës

Autoritetet ekuadoriane njoftuan të premten se në një operacion të profilit të lartë, kanë vendosur të nxjerrin 10,000 ushtarë për të luftuar bandat e drogës, të fajësuara për rritjen e dhunës në vendin e Amerikës Latine.

I vendosur midis dy eksportuesve më të mëdhenj të kokainës në botë, Kolumbisë dhe Perusë, Ekuadori është bërë një qendër tranziti për drogën dhe po përjeton një përshkallëzim të frikshëm të dhunës për shkak të përplasjeve midis bandave të lidhura me kartelet meksikane dhe kolumbiane.

Për t'u përballur me fenomenin, qeveria e Presidentit Daniel Noboa, një aleat i Presidentit të SHBA-së Donald Trump në rajon, ka vendosur të përforcojë forcat e sigurisë.

Siç bëri të ditur gjenerali Mario Vedoya midis 10,000 personave të vendosur dje ishin qindra anëtarë të forcave speciale, të cilët zbarkuan në qytetin e Guayaquil, një port i madh dhe një pikë kyçe e trafikimit, me mision për të garantuar sigurinë e bregdetit.

Ndërkohë, ministri i Mbrojtjes Giancarlo Loffredo urdhëroi ushtrinë të ndërmerrte veprime për një periudhë të pacaktuar në qytetin, që cilësohet si kryeqyteti ekonomik i Ekuadorit. Ministria e Mbrojtjes siguroi në një deklaratë se "burg ose ferri pret këdo që rrezikon sigurinë e vendit”

Avionë me personel ushtarak u dërguan gjithashtu në Manta, portin kryesor të peshkimit të vendit, e cilësuar po ashtu si një qendër kritike.

Në mesin e dhjetorit, Uashingtoni njoftoi se po dërgonte trupa amerikane në Ekuador si pjesë e një misioni të përkohshëm kundër trafikut të drogës.

Dikur një oaz paqeje dhe qetësie në rajonin e Amerikës Latine, një nga vendet e saj më të sigurta, Ekuadori e mbylli vitin 2025 me një shkallë vrasjesh prej 52 viktima për 100,000 banorë, ose një në orë, sipas shifrave nga Observatori i Krimit të Organizuar.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)