"Lundroni pa problem në Hormuz", Trump: E kemi goditur Iranin më fort se kushdo në histori, ende s'kemi mbaruar

Në kulmin e tensioneve në Ngushticën e Hormuzit, ku tre anije u sulmuan këtë të mërkurë nga forcat iraniane, Presidenti amerikan Donald Trump ka folur rreth luftës dy javore pak para se të hipte në helikopterin ‘Marine One’ për të udhëtuar drejt Bazës së Përbashkët Andreës.

“Ne shkatërruam marinën e tyre, forcën e tyre ajrore, fundosëm 16 nga anijet e tyre të drogës, askush nuk ka parë kurrë diçka të tillë më parë. Ata nuk kanë radar, udhëheqësit e tyre janë të vdekur. Po lëmë pas disa gjëra që nëse i shkatërrojmë, ose mund t'i shkatërrojmë deri sot pasdite, në fakt, brenda një ore, ata kurrë nuk do të jenë në gjendje ta rindërtojnë këtë vend. Ne i kemi goditur ata më fort se çdo vend tjetër në histori dhe nuk kemi mbaruar ende", tha presidenti amerikan për operacionin kundër Iranit.

Ai nuk la as pa përgëzuar trupat amerikane, madje duke treguar sesi po duken ato në sytë e botës.

“Kam folur me shumë udhëheqës në botë, ata më thonë se kemi ushtrinë më të mirë, se nuk kanë parë kurrë diçka të tillë më parë”, shtoi Trump.

Trump tha se nuk besonte që Irani kishte arritur të vendoste mina në Ngushticën e Hormuzit, edhe pse këmbënuli se SHBA-të kishin shkatërruar "pothuajse të gjitha anijet e tyre që mbanin mina”.

“Ne shkatërruam pothuajse të gjitha anijet e tyre që mbanin mina brenda një nate", tha ai, duke sugjeruar se deri në 60 anije iraniane u goditën. "Pothuajse e gjithë flota e tyre është shkatërruar", deklaroi shefi i Uashingtonit.

Trump gjithashtu inkurajoi anijet cisternë të kalonin nëpër Ngushticën e Hormuzit, duke këmbëngulur se ishte e sigurt pavarësisht sulmeve ndaj tre anijeve në kanalin ujor më herët gjatë ditës, incidente për të cilat Irani ka marrë përgjegjësinë. "Mendoj se ata duhet ta përdorin Ngushticën", tha Trump.

Por ndryshe nga çfarë thotë Presidenti i SHBA-ve, Reuters raporton se Irani vendosi rreth një duzinë minash në Ngushticën e Hormuzit. Duke ju referuar dy burimeve konfidenciale, agjencia e lajmeve thotë se vendndodhjet e shumicës së minave ishin të njohura.

Dyshimet për minimin e Ngushticës janë të forta pasi Teherani ka paralajmëruar vazhdimisht se mund të kundërpërgjigjet duke vendosur mina nëse sulmohet ushtarakisht.

Rreth një e pesta e tregtisë botërore të naftës dhe gazit zakonisht kalon nëpër këtë rrugë ujore, duke i dhënë Iranit një ndikim të konsiderueshëm mbi Shtetet e Bashkuara dhe aleatët e saj nëse transporti detar në zonë ndërpritet.

Kreu i marinës së Gardës Revolucionare, Alireza Tangsiri, paralajmëroi pasditen e së mërkurës se anijet që kalojnë nëpër Ngushticën e Hormuzit duhet së pari të marrin leje nga Republika Islamike.

Deklarata u transmetua nga mediat pro-iraniane dhe anti-iraniane të mërkurën. Sipas gazetës Iran International me seli në Londër, Tangsiri tha se anijet që injoruan paralajmërimet nga marina iraniane dhe Garda Revolucionare dhe u përpoqën të kalonin nëpër rrugën ujore "hasën probleme".

Zyrtari iranian përmendi konkretisht dy anije, Expres Rome dhe Mayuree Naree, duke thënë se ato u përpoqën të kalonin nëpër ngushticë pavarësisht paralajmërimeve dhe "u përfshinë në incidente".

Anija transportuese me flamur tajlandez, Mayuree Naree, u godit nga dy predha, duke shkaktuar zjarr dhe dëmtime në dhomën e motorrit, sipas operatorit Precious Shipping.

“Njëzet anëtarë të ekuipazhit u evakuuan dhe u dërguan në Oman, ndërsa tre persona u raportuan të zhdukur”, tha ministria e Transportit në Tajlandë. Ministria shtoi se ekuipazhi braktisi anijen duke përdorur një varkë shpëtimi dhe më vonë u shpëtuan nga marina e Omanit.

Sakaq, Trump pati sërish kritika për Spanjën. Shefi i Shtëpisë së Bardhë tha se “ata nuk e dinë çfarë po bëjnë”. “Nuk po sillen mirë me NATO-n. Njerëzit në atë vend janë fantastikë, por lidershipi nuk është aq i mirë", theksoi ai.

Presidenti amerikan u pyet gjithashtu për situatën në Liban, me Trump që e bëri të qartë se operacioni do të vijojë për të zhdukur me rrënjë lidhjet iraniane.

“Njerëzit në Liban janë shumë të mirë, por ne duhet të heqim qafe Hezbollahun”, nënvizoi ai.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)