Përmbytje të mëdha në Kenia, 62 viktima

Të paktën 62 persona kanë vdekur në Kenia gjatë javës së kaluar pasi shirat e rrëmbyeshëm shkaktuan përmbytje të gjera, thonë autoritetet.

Numri i mëparshëm i të vdekurve, i publikuar një javë më parë, ishte 42.

Gjatë natës, 11 persona u shpëtuan pasi një minibus-taksi, i njohur në vend si matatu, u bllokua ndërsa uji u rrit në kryeqytetin Nairobi, sipas Kryqit të Kuq të Kenias, ndërsa dy fëmijë u shpëtuan nga një shtëpi e përmbytur.

Reshjet e mëdha të shiut gjatë javës së kaluar kanë shkaktuar përmbytje të menjëhershme që nuk janë parë prej vitesh. Lumenjtë kanë dalë nga shtrati, duke përmbytur shtëpitë dhe duke dëmtuar rrugët, linjat e energjisë dhe të ujit.

Disa rrugë janë mbyllur pasi urat u dëmtuan në Nairobi, ndërsa disa shkolla u përmbytën gjithashtu pas rreshjeve të së shtunës.

Ministria e Brendshme paralajmëroi të dielën se pjesë të ndryshme të vendit po vazhdonin të përjetonin shira të rrëmbyeshëm, duke rritur rrezikun e përmbytjeve.

Autoritetet u kanë kërkuar banorëve në zonat e ulëta të zhvendosen në terren më të sigurt dhe më shumë se 2,000 njerëzve u është dashur të largohen nga shtëpitë e tyre për të kërkuar strehim.

Policia thotë se operacionet e kërkim-shpëtimit po vazhdojnë pas "shiut të rrëmbyeshëm dhe përmbytjeve shkatërruese që pasuan që prekën pjesë të ndryshme të vendit".

Më shumë se gjysma e viktimav, 33 kanë qenë në Nairobi, ku kanalizimi i dobët ka qenë një faktor kryesor, së bashku me bllokimin e lumenjve të shkaktuar nga zhvillimi i parregulluar.

Presidenti William Ruto tha të dielën se furnizimet emergjente me ushqim dhe ndihma mjekësore po u dorëzoheshin të prekurve.

Ai tha gjithashtu se autoritetet po pastronin sistemet e bllokuara të kullimit.

Përmbytjet nuk kanë prekur vetëm Kenian.

Më shumë se 100 njerëz humbën jetën në Etiopinë fqinje pas përmbytjeve dhe rrëshqitjeve të tokës në jug të vendit.

Shumë faktorë kontribuojnë në përmbytje, por një atmosferë ngrohëse e shkaktuar nga ndryshimet klimatike i bën reshjet ekstreme më të mundshme.

Bota është ngrohur tashmë me rreth 1.1 gradë Celsius që nga fillimi i epokës industriale dhe temperaturat do të vazhdojnë të rriten nëse qeveritë në të gjithë botën nuk bëjnë ulje të ndjeshme të emetimeve.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)