“Jemi në luftë”, shteti në Amerikën Latine nxjerr 75 mijë policë e ushtarë në rrugë kundër bandave kriminale

Qeveria e Ekuador ka dislokuar më shumë se 75 mijë efektivë policie dhe ushtarë në katër provincat më të goditura nga dhuna kriminale, në një përpjekje të re për të luftuar bandat e trafikut të drogës.

Sipas ministrit të Brendshëm, John Reimberg, forcat e sigurisë janë vendosur në provincat El Oro, Guayas, Los Ríos dhe Santo Domingo de los Tsáchilas, ndërsa autoritetet kanë shpallur edhe shtetrrethim gjatë natës në këto zona. Masat janë pjesë e asaj që qeveria e quan një “fazë të re” në luftën kundër krimit të organizuar.

“Jemi në luftë”, deklaroi Reimberg, duke u bërë thirrje banorëve që të mos rrezikojnë dhe të qëndrojnë në shtëpi gjatë orëve të kufizimit të lëvizjes.

Presidenti Daniel Noboa, i cili mori detyrën në nëntor të vitit 2023, ka ndërmarrë një seri masash të ashpra për të frenuar dhunën e lidhur me trafikun e drogës. Megjithatë, vendi regjistroi një nivel rekord të vrasjeve në vitin 2025, ndërsa shkalla e vrasjeve u rrit me më shumë se 30% nga viti 2024 në 2025.

Pozicioni gjeografik i Ekuadorit, mes Kolumbisë dhe Perusë, dy nga prodhuesit më të mëdhenj të kokainës në botë, e ka kthyer vendin në një pikë kyçe tranziti për trafikun e drogës. Vlerësohet se rreth 70% e kokainës së prodhuar në këto dy vende kalon përmes Ekuadorit.

Qeveria e Noboas ka intensifikuar bashkëpunimin me administratën e presidentit amerikan Donald Trump për të frenuar rrjedhën e kokainës drejt Shteteve të Bashkuara. Së fundmi, FBI hapi zyrën e saj të parë në këtë vend të Amerikës Latine, ndërsa dy vendet kanë nisur operacione të përbashkëta kundër narkotikëve.

Noboa ishte gjithashtu mes liderëve të Amerikës Latine që morën pjesë në një takim ndërkombëtar të organizuar nga Trump në Mar-a-Lago, ku u diskutua lufta kundër karteleve të drogës në hemisferën perëndimore. Në këtë takim, Trump i krahasoi bandat kriminale me një “kancer”, duke u bërë thirrje vendeve të rajonit të përdorin edhe forcat ushtarake për t’i çrrënjosur ato.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)