Bangladeshi pushtohet nga fruthi, mbi 330 viktima prej marsit

Bangladeshi po përballet me një shpërthim të rëndë të fruthit, ku që nga mesi i muajit mars kanë humbur jetën të paktën 336 fëmijë.

Sipas të dhënave zyrtare nga Drejtoria e Përgjithshme e Shërbimeve Shëndetësore, numri i rasteve të konfirmuara ka kaluar mbi 51 mijë, pasi në 24 orët e fundit u regjistruan më shumë se 1 mijë e 500 raste të reja.

Kryeqyteti Daka mbetet zona më e prekur, me 168 viktima të raportuara deri tani.

Autoritetet shëndetësore kanë pranuar vështirësi në verifikimin e menjëhershëm të rasteve për shkak të mungesës së theksuar të kiteve të testimit gjatë përhapjes së epidemisë në të gjithë vendin.

Sipas Organizatës Botërore të Shëndetësisë, shpërthimi i fruthit lidhet me uljen e mbulimit të vaksinimit, sidomos pas mungesës së vaksinave gjatë viteve 2024-2025.

Ndërkohë, autoritetet konfirmuan se vendi ka marrë 1.5 milionë doza të vaksinës kundër fruthit dhe rubeolës, ndërsa priten edhe 18 milionë doza të tjera në ditët në vijim.

Fruthi është një sëmundje virale shumë ngjitëse që prek kryesisht fëmijët dhe mund të shkaktojë komplikacione serioze si pneumonia, inflamacioni i trurit dhe vdekja, veçanërisht tek fëmijët e pavaksinuar ose të kequshqyer.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)