Shkencëtarët zbulojnë jetë në vendin ekstrem në Tokë

Një zbulim i pazakontë shkencor në Shtetet e Bashkuara mund të ndryshojë mënyrën se si studiuesit e kuptojnë jetën në kushte ekstreme. Hetues nga Universiteti i Syracuse kanë zbuluar një formë jete në Parkun Kombëtar Vullkanik Lassen, në veri të Kalifornisë, në një mjedis që deri më tani konsiderohej pothuajse i papërshtatshëm për organizma kompleksë.

Gjatë studimit të avujve që dalin nga thellësitë e Tokës, shkencëtarët morën mostra uji nga zona të parkut ku uji ka përbërje neutrale, as acid dhe as alkalin. Në këto mostra ata identifikuan një amebë, një organizëm mikroskopik njëqelizor, i aftë të lëvizë dhe të ushqehet pa pasur një strukturë trupore të ngurtë.

Fillimisht, ameba dukej e pajetë, por në kushte laboratorike ndodhi e papritura, ajo jo vetëm që mbijetoi në temperaturat e larta të ujit, por edhe u zhvillua. Studiuesit vërejtën se organizmi ishte i aftë të ndahej dhe të riprodhohej në temperatura deri në 63 gradë celsius, kushte që janë vdekjeprurëse për qelizat e njerëzve, kafshëve dhe bimëve.

Për të testuar kufijtë e rezistencës, shkencëtarët rritën temperaturën e ujit deri në 64 dhe më pas në 70 gradë celsius. Edhe në këto kushte ekstreme, ameba nuk u shkatërrua, por formoi një lloj gjendje të fjetur, i cili mund të riaktivizohej kur temperatura ulej.

Sipas studimit, ky është rasti i parë kur një organizëm eukariot, me qeliza që kanë bërthamë, arrin të mbijetojë në temperatura kaq të larta. Deri më tani, vetëm disa kërpudha dhe alga kishin arritur të përballonin temperatura deri në 60 gradë. Ky zbulim, sipas mikrobiologes Angela Oliverio, hap horizonte të reja mbi kufijtë e jetës dhe sugjeron se mund të ekzistojnë edhe organizma të tjerë ekstremisht rezistentë që ende nuk janë zbuluar.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)