“Rruga e verdhë” në fund të oqeanit që befasoi shkencëtarët

Një zbulim i rrallë në thellësitë e oqeanit ka tërhequr vëmendjen e shkencëtarëve, pasi studiuesit hasën në një formacion që i ngjan një “rruge të verdhë”, në një nga zonat më pak të eksploruara të planetit.

Zbulimi u bë në vitin 2022 nga anija kërkimore Nautilus, gjatë një ekspedite në veri të ishujve Havai, në zonën e Papahānaumokuākea Marine National Monument, një nga rezervatet më të mëdha detare në botë.

Pamjet e publikuara tregojnë një sipërfaqe që ngjan me një rrugë të shtruar me “tulla të verdha”, duke bërë që një prej studiuesve të shprehej me humor: “Është rruga drejt Atlantidës”. Formacioni ndodhet rreth 1,000 metra nën sipërfaqen e ujit dhe, ndonëse në thellësi të madhe, krijon iluzionin e një terreni të thatë.

Sipas ekspertëve, kjo strukturë është në fakt një rrjedhë e fragmentuar e shkëmbit vullkanik të quajtur hialoklastit, i krijuar nga shpërthime me energji të lartë. Çarjet e veçanta në formë këndesh 90 gradë janë rezultat i stresit termik nga ciklet e përsëritura të ngrohjes dhe ftohjes gjatë aktivitetit vullkanik.

Studiuesit theksojnë se vetëm një përqindje minimale e funddetit është eksploruar deri më sot, çka do të thotë se zbulime të tilla mund të jenë shumë më të shumta se sa mendohet.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)