Policia e Kosovës sekuestron sërish armatim në Leposaviq

Policia e Kosovës ka zbuluar dhe sekuestruar një sasi të konsiderueshme armësh, municioni dhe pajisjesh ushtarake në dy raste të ndara në komunën e Leposaviqit, gjatë veprimeve operative të zhvilluara ditët e fundit.

Rasti i parë është regjistruar më 19 dhjetor në fshatin Rvatska, ku zyrtarët e Njësisë për Ndërhyrje të Shpejtë, gjatë patrullimit hynë në një shtëpi të pabanuar. Brenda objektit janë gjetur armë të ndryshme, përfshirë një armë gjuetie, një karabinë dhe një armë automatike të tipit AK-47, si dhe rreth 240 fishekë dhe një palë dylbi. Hetimet kanë vazhduar edhe disa ditë më vonë, kur në objektet ndihmëse të së njëjtës shtëpi janë zbuluar pajisje shtesë, si pushkë ajrore, mekanizëm për barut, thikë ushtarake dhe një mbajtëse për revole. Për këtë rast, deri më tani nuk ka persona të arrestuar dhe hetimet janë ende në vazhdim.

Ndërkohë, rasti i dytë ka ndodhur në fshatin Veacev, ku më 20 dhjetor, policia ka arrestuar një person. Gjatë kontrollit në shtëpinë e tij janë gjetur armë gjuetie, një pushkë gjysmë automatike, një bombë dore, dy tromblona, municion i kalibrave të ndryshëm dhe pajisje ushtarake. Pas intervistimit dhe inicimit të rastit penal, i dyshuari është liruar me vendim të prokurorit dhe do të hetohet në procedurë të rregullt.

Autoritetet e sigurisë kanë theksuar se veprimet e tilla synojnë rritjen e sigurisë publike dhe parandalimin e posedimit të paligjshëm të armëve, duke garantuar rend dhe qetësi për të gjithë qytetarët.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)